Обзерач Природы #67 – пятниця, 13.00 год.

Маме в Польщы 23 нацийональны паркы. Занимают они обшыр лем 1 процента цілой державы. Маме тото щестя, же єден з парків находит ся на Лемковині. Очывидно бесіда о Маґурскым Нацийональным Парку. В найновшым одтинку Обзерача Природы підеме на малу вандрівку в околиці села Фолюш, де будеме захоплювати ся чудовом природом, якa єст гев під охороном.

Моя пропозиция екскурсиі тыкат конкретні природничой стежкы в лісах недалеко Фолюша. Уможливит она нам присмотрюваня ся бескідскым водопадам, великым скальным формациям і буковым лісам.

Вчас авдициі представлю не лем найважнійшы природничы атракциі той части Маґурского Нацийонального Парку, але і тіж оповім цікаву леґенду о возниканю Диявольского Каменя над Фолюшом. Як уж ся можете додумати, істория буде мала дашто спільне з диявольом…

Обзерача (лемківской) Природы послухате уж в найблизшу пятницю, 20. грудня/децембра, о 13.00 год. Одтинок буде повтаряный в суботу, 21. грудня/децембра о 7.00 год. і в віторок 24. грудня/децембра о год. 15.15. До стрічы на (радийовым) шляку!

джерело знимкы: Korona b, Wikimedia Commons, CC BY-SA 3.0