Обзерач Природы #62 – пятниця, 13.00 год.

Не самом Лемковином чловек жыє, можеме повісти. Зато як раз в найновшым одтинку Обзерача Природы підеме глядати ґеолоґічных чудес на обшыри Кракова. Столиця Малопольщы єст барз богата в вынятковы природничы атракциі, а особливо вельо іх найдеме в Тынци – найбарже на захід находячым ся районі міста.

Тынец асоциюєме предовшыткым з монастырьом Бенедиктинів, якій находит ся на высокій, вапняковій скалі над Віслом. Факт, є то красне місце, але не єдине, до котрого можеме там піти. В Обзерачу Природы буду заохочувал слухачів до малой екскурсиі до карстового джерела святого Яна, де спід скальной стіны выплыват вода. Другого такого місця в Кракові неє! Окрем самого джерела познаме тіж леґенды звязаны в тынецкыма горами.

Оповіст о краківскым, карстовым джерелі буде мала свою премєру в пятницю, 15. листопада/новембра, о 13.00 год. Одтинок буде повтаряный в суботу, 16. листопада/новембра о 7.00 год. і в віторок 19. листопада/новембра о год. 15.15. До стрічы на (радийовым) шляку!

джерело знимкы: Kriksos, Wikimedia Commons, CC BY 3.0