Обзерач Природы #39 – пятниця, 13.00 год.

Сердечні просиме слухати природничый проґрам на антені ЛЕМ.фм уж в найблизшу пятницю, 17. вересня/септембра 2021 р., о 13.00 год. «Обзерач Природы» то пропозиция для любителів природы, лісовых звірят, вандрівок в незнане.

Літо уж минуло. Мілийоны туристів поіхали, як што рока, над польскє море – купали ся, опаляли, іли «традицийны ґофры» ци рыбы, о шаленых цінах котрых чула ціла держава. Ци о Балтийскым Мори знаме уж вшытко? Бесідуют, же холодне, але ци маме свідомост його чыстоты і знаме о вельох еколоґічных драмах, якы проходят в морскых глубинах? В найблизшым одтинку призриме ся Балтикови з інчой, меньше кольоровой стороны.

Проґрам веденый єст Якубом Зиґмунтом, ґеолоґом і пасийонатом гірскых вандрівок. «Обзерача Природы» мож слухати в кажду пятницю о 13.00 год., а повторіня авдициі будут емітуваны в середы о 10.00 год.