Обзерач Природы #28 – пятниця, 13.00 год.

Сердечні просиме слухати природничый проґрам на антені ЛЕМ.фм уж в найблизшу пятницю, 16. квітня/апріля 2021 р., о 13.00 год. «Обзерач Природы» то пропозиция для любителів природы, лісовых звірят, вандрівок в незнане.

Акция найблизшого одтинка «Обзерача Природы» буде проходила в Татрах. Давно сме не вандрували по найвысшых горах цілых Карпат. В проґрамі підеме здобывати Червены Верхы – вынятковы горы, якы находят ся в центральній части Татр. Познаме іх особливости, ґеолоґічну будову, як і пару можливых доріг, по котрых можеме дойти на сам верх. Одтинок тот буде другым з мінісериі інспіруваной діяльністю подорожника і гірского вандрівника Пьотра Косярского, автора блоґа Мапа Бездорожа.

Проґрам веденый єст Якубом Зиґмунтом, ґеолоґом і пасийонатом гірскых вандрівок. «Обзерача Природы» мож слухати в кажду пятницю о 13.00 год., а повторіня авдициі будут емітуваны в середы о 10.00 год.