Обзерач Природы #23 – пятниця, 13.00 год.

Сердечні просиме слухати природничый проґрам на антені ЛЕМ.фм уж в найблизшу пятницю, 5. марця 2021 р., о 13.00 год. «Обзерач Природы» то пропозиция для любителів природы, лісовых звірят, вандрівок в незнане.

Поіхаме в найблизшым одтинку до Явірок, а докладні до Білой Воды – давнійшого русиньского села. Можеме автом, але тіж сут бусы з центра Щавниці. Авто найліпше (і для природы, і для свойого здоровля) лишыти деси в центрі села, а пак піти піше до Білой Воды. Старой русиньской архітектуры на жаль уж вельо видіти не будеме, але будут появляти ся перед нами малы капличкы, котры іщы памятают стары часы. З центра Явірок до нашой ціли маме докладні 2,1 кілометра. Не є то вельо, а достаточні, же почуєме в ногах, же сме вандрували. По близко 2 кілометрах прогулькы дойдеме до границі резервату природы «Біла Вода». Гев одыйдеме од головной дорогы і вернеме наліво, за червеным туристичным шляком. Тепер уж лишыт ся нам ся остатнє 250 метрів догоры. Не змучыме ся, але скоро дійдеме до ціли. Перед нашыма очами вкаже ся велика базальтова скалка, о котрій єст цілый наш днешній проґрам.

Одкаль ся взяла базальтова скала всередині вапняковых Пєнін? О вшыткых таємницях з ньом звязаных ся дознате уж о 13.00 год.! Слухайте конечні!

Проґрам веденый єст Якубом Зиґмунтом, ґеолоґом і пасийонатом гірскых вандрівок. «Обзерача Природы» мож слухати в кажду пятницю о 13.00 год., а повторіня авдициі будут емітуваны в середы о 10.00 год.