Обзерач Природы #21 – пятниця, 13.00 год.

Сердечні просиме слухати природничый проґрам на антені ЛЕМ.фм уж в найблизшу пятницю, 19. лютого/фебруара 2021 р., о 13.00 год. «Обзерач Природы» то пропозиция для любителів природы, лісовых звірят, вандрівок в незнане.

Маленькє село, якє находит ся в долині Вислока. Пару хыж, давный ПҐР (сельскє господарство), єден склеп і туристичный осередок. Наштоден жыє гев менше як 40 люди, літом приізджат іх кус більше, але лем з той причыны, же кінцьом серпня/авґуста орґанізувана єст аґрарна выстава офіцийно звана Загальнодержавном Выставом Сіментальской Худобы. Така єст Рудавка Рыманівска. Але не о тым будеме слухати в найблизшым одтинку «Обзерача Природы». Підеме на ґеолоґічну прогульку. Станеме перед Стіном Ользы – єдном з найбільшых скальных стін в Карпатах. Пак послухаме, што то сут менілітовы лупкы і чом сут так важны в нафтовым бізнесі. Дальше дознаме ся про місцевы травертины і ледопады, якы мож обзерати зимом. Абсолютні не забудте о проґрамі! Чуєме ся, як все, о 13.00 год.

Проґрам веденый єст Якубом Зиґмунтом, ґеолоґом і пасийонатом гірскых вандрівок. «Обзерача Природы» мож слухати в кажду пятницю о 13.00 год., а повторіня авдициі будут емітуваны в середы о 10.00 год.