Обзерач Природы #16 – пятниця, 13.00 год.

Сердечні просиме слухати природничый проґрам на антені ЛЕМ.фм уж в найблизшу пятницю, 15. сiчня/януара 2021 р., о 13.00 год. «Обзерач Природы» то пропозиция для любителів природы, лісовых звірят, вандрівок в незнане.

В днешнім одтинку проґраму підеме вкінци на Лемковину. Познаме Маґурскій Нацийональный Парк, якій находит ся на пограничы ґорлицкого і ясельского повітів. Хоронит він велику част давного карпатского ліса, в котрым роснут такы цінны дерева як сосны, букы і яворы. Окрем того обшыр Парку єст мостом медже природничыма екосистемами Східніх та Західніх Карпат. В «Обзерачу Природы» послухаме про історию Маґурского Нацийонального Парку, його флору і фауну, його климат та аж і дознаме ся, як называют ся особливы вітры, якы дуют на тым терені. Як тема звучыт для Вас інтересуючо, то конечні слухайте проґраму о 13.00 год.!

Проґрам веденый єст Якубом Зиґмунтом, ґеолоґом і пасийонатом гірскых вандрівок. «Обзерача Природы» мож слухати в кажду пятницю о 13.00 год., а повторіня авдициі будут емітуваны в середы о 10.00 год.