«Обіцюю навчыти ся вашого языка…» – владыка Юрий на днешнім інґресі до Лемків

В неділю, 18. червця/юна т.р., в православным катедральным храмі Рождества Пресвятой Богородиці во Вроцлаві прошла інтронізация архієпископа Юрия (Паньковского) на нового предстоятеля вроцлавско-щеціньской єпархіі. В торжественных богослужынях взяли участ владыкы: Авель – архієпископ люблиньско-холмскій, Владимір – архієпископ владимір-волыньскій і ковельскій, Яков – архієпископ білостоцко-ґданьскій, Паісий – єпископ перемышльско-ґорлицкій та Григорий – єпископ супрашльскій. Окрем чысленного духовеньства і вірных ПАПЦ, на інґресі нового владыкы присутны были представникы інчых віросповідань. До вроцлавской катедры пришли представникы Християньской Теолоґічной Академіі в Варшаві, ґенералы і офіцеры Польского Войска, в котрым владыка Юрий веде послугу Православного Ординария Польского Войска. Присутны были і дальшы гості, якы пришли в тот ден поздоровити нового предстоятеля з його інґресом.

Неприсутний архієпископ Сава, митрополита Варшавскій і цілой Польщы, переслал на рукы владыкы Юрия писмо, котре одчытал архієпископ Авель. В листі митрополита спомянул, што вроцлавско-щеціньска єпарія є надзвычайна за причыном вірных, якы нашли ся на тых землях в наслідстві подій ІІ Світовой Войны та акциі «Вісла». В тым чыслі єпархію творят і Лемкы, про якых написал митрополита. Архієпископ Авель, по одчытаним листі, доповіл од себе, што в єпархіі яком буде завідувал новий владыка сут Лемкы, серед котрых жывий є дух священномученика Максима Ґорлицкого.

В дальшым слові новий архієпископ вроцлавско-щеціньскій Юрий звернул ся з особливым словом до тых вірных, котры 70 років тому потерпіли і нашли ся в наслідстві выгнаня на чужыні. Владыка подякувал тым особам, якых штораз меньше в жывых, за труд вложений в переданя молодшым ґенерациям рідного языка, культуры, віры та за орґанізуваня парохій в західній Польщы. Архієпископ Юрий звернул ся зо словом до Лемків, в котрым повіл: […] обіцюю навчыти ся вашого языка. Владыка зазначыл, што лемківскій язык є дакус інчий од украіньского.

Владыка Юрий є наслідовником бл.п. архієпископа Єреміі, котрий вроцлавскo-щеціньском єпархійом завідувал 34 рокы. Новий архієпископ заповіл продолжаня роботы своіх попередників.