О тыжден в Люблині стартуют «Фольковы Миколайкы»

Любельскій 29. Медженародный Фестіваль Народной Музикы «Фольковы Миколайкы» проходил буде в днях од 29. листопада/новембра до 1. грудня/децембра.

«Фольковы Миколайкы» то інтердисциплинарна подія присвячена ріжным аспектам традицийной культуры, способам єй захованя в сучасным світі, можливостям інспірациі фольклором в розмаітых обшырях штукы і інчым активностям. Але головні то фествіаль фольковой музикы.

Зачне ся в Центрі Стріч Культур в пятницю, 29. листопада/новембра 2019 рока, переглядом «Одкрыта Сцена». То конкурсовый коцнерт для дебютуючых артистів, якы інспіруют ся фольклором. Є то найстаршый в Польщы і єден з двох істнуючых переглядів для того рода фольковых выконавців. Того самого дня о год. 20.30 орґанізаторы запрашают на концерт украіньско-польского ансамблю Даґадана, якій лучыт музичны традициі обох держав хоснуючы джаз, електорніку та світову музику.

В суботу на 18.00 год. заплянувано концерт «Стрічы Культур», вчас котрого окрем ґаздів – Оркєстры св. Миколая, выступлят Калакан з Краю Басків та єден з найліпшых ромскых ансамблів з Мадяр – Роменґо. Калакан в баскійскым языку означат бесіду. Через спів, головні a capella, троіх вокалистів ґрупы Калакан, передає традицийны баскійскы пісні, якы записуваны были протягом пятстох років. Характерны сут для них выдатні згармонізуваны голосы і сучасны мінімалістичны аранжациі.

В неділю на вечер одбуде ся выступит Намґар, вокалисткы і інструменталисткы з Бурятиі з Сибіра. Kонцертам товаришыт вельо інчых подій, а то: поконкурсова выстава «Традиция в обєктиві», наукова конференция про ґенезу і проявы народной штукы в музиці, літературі і театрі та про народну штуку вчера і днес, ярмак та розмаіты варштаты. Буде мож м.ін. навчыти ся ромскых і угорскых танців, африканьскых пісен, гры на абориґеньскым інструменті, вырабляти прикраскы на яличку. В проґрамі нашли ся тіж доповід про смыковы музичны інструменты ци варштаты для наймолодшых (давны згадуванкы, рахуванкы, співанкы, забавы).

Детальный проґрам найдете на сайті фестівалю: mikolajki.folk.pl.

Фот. Прес. мат. орґанізатора