O спільных ініциятивах Малопольщы і Пряшівского Краю

Справы звязаны з транспортом, зрівноваженым розвитком і культуром – то основны квестиі, про якы бесідували вчас першой в тій каденциі робочой стрічы маршалка Малопольского Воєвідства Вітольда Козловского з ведучым Самосправного Пряшівского Краю Міланом Маєрскым.

В стрічы участ взяли тіж Томаш Кашай, ґенеральный консуль Словациі в Кракові, та бургомайстер Старого Санча Яцек Лелек. Стріча проходила в Повітовій і Містецко-Ґмінній Публичній Бібліотеці ім. Віктора Базєліха в Старым Санчы.

«То перша така стріча в текучій каденциі самоуряду воєвідства, будуча результатом бесід вчас минулорічного Форум в Креници» – повіл маршалок Вітольд Козловскій. «Разом з нашыма словацкыма партнерами думаме над тым, в якых обшырях, і в котрых місцях наш діалоґ і наша спілпраца повинны быти барже насилены. Безпосередній контакт директорів нашых урядів є о вельо барже хосенный, як майльова кореспонденция» – продлжал.

Задоволіня з активности сусідуючых з собом реґіональных самоурядів не вкрывал консуль Томаш Кашай. «Приграничны обшыри сут сказаны на спілпрацу. Переконую про тото на вшыткых можливых стрічах, што часом є тяжкє. Гев ініциятива спілпрацы першый раз не іде од мене, не є ефектом моіх старань. Желал бым собі веце так выдатных люди на важных становисках як ґазды Пряшівского Краю і Малопольщы».

Вчас стрічы директоры департаментів Уряду Самосправного Пряшівского Краю та Маршалківского Уряду Малопольского Воєвідства зосереджали ся головні на ініциятивах звязаных з транспортом, дороговом інфраструктуром, зрівноваженым розвитком і культуром. Представлено тіж проєкт Стратеґіі Малопольщы 2030 в аспекті діянь тыкаючых приграничной обшыри та інформацию про вводіня Проґраму Трансграничной Спілпрацы Інтерреґ Польща-Словация 2014-2020.

Догварка о спілпрацы медже Малопольскым Воєвідством а Самосправным Пряшівскым Крайом была підписана 14. жолтня/октобра 2003 р. на замку в Старій Любовни. Єй сиґнатариями были товдышній Маршалок Малопольского Воєвідства Януш Сепіол та Ведучый Самосправного Пряшівского Краю Петер Худік.

Фот. malopolska.pl