О бобрах в долині Вислокы – понедільок, 10.30 год.

17. лютого/фебруара тр. в Кривій експерты, при активній участи зобраной публикы, бесідували о бобрах. Дебата пн. «Што роблят бобры в долині Вислокы» выкликала великє заінтересуваня жытелів реґіону, а специялисты в темі з заанґажуваньом оповідали о звірятах, якым в посліднім часі робит ся «чорный» піар.

Чом «чорный» піар є барз несправедливый взглядом тых звірят? Чом не треба ся бояти іх сусідства? Што ім завдячаме? Ци потрібны бы нам были зовнішні очыщальні воды, кєд бы сме не ограничали в своій роботі бобрів? Яку воду лишают по собі тоты звірята? По што бобрам тамы? То лем мала част того, што довідате ся о бобрах.

Стоваришыня Долины запросило до бесіды «Што роблят бобры в долині Вислокы» др. Тадеуша Бохню, заступцю директора продукциі Водопроводів Міста Кракова, якій м.ін. проанализувал результаты баданя чыстости воды Вислокы в околицях бобровых сідлиск, Романа Ґлодовского, основателя і презеса Стоваришыня «Наш Бобер» і Адама Робіньского, журналисту і писменника, автора м.ін. книжок «Палацы на воді. Слідом польскых бобрів» ци «Кычеры. Подорож през Бєщады».

Експерты в зацікавляючый спосіб оповідали о тым, як ся водят бобры, што люблят, а чого не люблят істи, што є ім необхідне до жытя, якы сут іх родинно-товарискы привычкы і вельо, вельо інчого. Не бракло тіж інформаций о тым, коли бобры появили ся в долині Вислокы і хто іх спровадил, перше до Незнайовы, а пак дале.

Ретрансмісия бесіды в радию ЛЕМ.фм в понедільок 4. марця о год. 10.30, повторіня в ночы з понеділька на віторок, значыт 5. марця, о 3.00 год.