O. Баранчук попращал ся зо своіма парохіянами

В суботу, 6. лютого/фебруара 2021 р., в православній церкви св. Михала Aрхангела в Реґєтові была служена літургія, по котрій вірны попращали свого долголітнього пароха, о. прот. др. Аркадия Баранчука, якій одтепер буде служыл в сусідній єпархіі Польской Автокефальной Православной Церкви.

По літургіі одходячый з функциі пароха о. Баранчук был одзначеный медальом «Заслуженый для Пожарництва Ґорлицкой Землі».

«Дякую Богу за вшытко»

Скорше на офіцийным вебсайті ПАПЦ явила ся інформация, што 1. лютого/фебруара в Ґорлицях, Высокопреосвященнійшый Паісий, Архієпископ Перемышльскій і Ґорлицкій подякувал о. прот. Акрадийови Баранчукови за 23 рокы службы Церкви. Через тоты вшыткы рокы о. Баранчук парохувал в Ґладышові і Реґєтові та до недавна так само в Ждыни і Конечній.

Владыка Паісий, апробуючы просьбу о. Баранчука, звільнил го зо вшыткых становиск в перемышльско-ґорлицкій єпархіі і благословил перехід в склад духовенства лодзіньско-познаньской єпархіі ПАПЦ. В бесіді з нашом редакцийом, яка была проведена початком тыжня, о. Баранчук подал, што неє іщы декрету бесідуючого о його будучности, кєд іде о його послугу в новій єпархіі.

Єґомость Баранчук за свого парохуваня на Лемковині был орґанізатором і долголітнім директором Православного Осередка Милосердя Елеос в Ґладышові. На його місце на становиско директора осередка єрарха менувал о. прот. Мирослава Цідило, пароха Бортного. Заступцьом менуваный был о. Ярослав Ґрич, якій од даякого часу служыт в Ждыни і Конечній, а одтепер буде парохувал і в Ґладышові та дочырнім Реґєтові.

Вчас літургіі, яка была служена в минулу суботу в Реґєтові, о. Баранчук был нагородженый медальом за послугу несену як православный малопольскій капелян пожарничой стражы. Оцініня передали комендант Охотничой Протиогньовой Стражы з Устя Руского і дальшы пожарникы. О. Баранчук як православный капелян прошол курсы і школіня, котры дозволяют му брати участ в ратівничых акциях, в якых неєднократно брал участ.

Священник подякувал своім парохіянам за долголітню службу на Лемковині. На офіцияльным фанпейджы осередка Елеос в Ґладышові опубликувал пару фотоґрафій, вказуючых на його початкову дорогу і служыня в Ґладышові і сусідніх селах. Подякувал словами: «Дякую Богу за вшытко».

О. Аркадий Баранчук

Священник Аркадий Баранчук народил ся в 1973 році на Підляшы. В квітни/апріли 1998 рока зачал свій пут на Лемковині. Товды же владыка Адам (Дубец) рукоположыл о. Аркадия Баранчука і направил на парохію Ґладышів (з дочырньом церквю в Реґєтові) і на парохію в Ждыни (з дочырньом Конечном).

В 2001 році, з благословліня архієпископа Адама, основаный был в Ґладышові Православный Осередок Милосердя Елеос, котрый побудуваный был під оком і старунком о. Аркадия. Вчас свого парохуваня на Лемковині перше вєдно з вірныма Реґєтова піднял ся труду побудуваня нового храму, якій навязує архітектуром до стилю лемківскых церкви. Перед даякым часом заініциювал з селянами Ґладышова поставити в тым селі нову церков, якой будова помалы поступує. Сес храм буде репликом старовинной деревяной церкви свв. Космы і Даміяна з Незнайовой.

За свою діяльніст і працу на хосен Церкви священник был в 2009 році нагородженый через владыку Адама почестном грамотом, в 2012 році ордером св. Мариі Магдалины III ступени, а в 2014 році бронзовым Крестом Заслугы через Президента Польской Республикы Броніслава Коморовского. Священник был так само оціненый в плебісциті «Краківской Ґазеты», в рамках котрого выберана была Персона 2017 рока. Занял товды перше місце в катеґориі Соспільна і благодійна діяльніст. В 2015 р. на Християньскій Богословскій Академіі в Варшаві одбыла ся оборона докторской працы о. Баранчука пн. «Православна Церков на териториі білостоцкого воєвідства в роках 1944-1956».

фот. Facebook, Петро Ротко; www.orthodox.pl