Новый склад соймовой Комісиі Нацийональных і Етнічных Меншын

По першым засіданю Сойму Польской Республикы новой Х каденциі, посланці выбрали склады поєдных соймовых комісий. Тым самым выбраны выли члены Комісиі Нацийональных і Етнічных Меншын на рокы 2023-2027.

То єдна з тзв. постійных соймовых комісий, котра має за задачу занимати ся справами звязаныма з підтримуваньом культуровой спадковины нацийональных і етнічных меншын, якы сут вызнаны польскым законодавством.

Ведучом меншыновой комісиі выбрана была посланкыня Лівиці, Ванда Новіцка. Функцию полнила уж в попередніх каденциях. Єй заступцями выбрано Моніку Росу з Громадяньской Коаліциі і Войцєха Зубовского з Права і Справедливости. Третій з віцеведучых має быти обраный в пізнійшым часі.

Припомнийме, што посланкыня Моніка Роса походит зо Шлеска, а в 2017 р. брала участ як посланкыня в одкрытю памятника лемківскым жертвам в місци Центрального Лаґру Працы в Явожні.

Окрем президиі, Комісию творит іщы пятьох інчых посланців КО, трьох з ПіС і по єдным з Польщы 2050 – Третя Дорога, Польского Народного Сторонництва – Третя Дорога, Кукіз 15 і Конфедерациі.

На розділ од пепередніх каденций – в Комісиі ніт меншынового посланця – дотеперішній посланец німецкой меншыны, яка од років мала свого представника в парляменті, не достал ся до Сойму Х каденциі (інформували сме о тым гев). То перша така ситуациа од 1991 р. Інчом небезпеком для меншыновых інтересів сут хоц-бы пропозиці знесіня выборчой привілегиі. Хоц в тогорічных выборах до парляменту стартували кандидаты, якы ясно підперали лемківскы справы, то на жаль никотрый з них не отримал мандату (то м.ін. Богдан Ґоч, Ян Войтович і Андрий Барна).

Склад Комісиі протягом каденциі може ся міняти – в попередній каденциі такы зміны проходили парократно.

Згідно з реґуляміном Комісия Нацийональных і Етнічных Меншын мат занимати ся справами, што мают за ціль покріпляти культуру і достоменніст меншын, занимати ся іх етнічныма і языковыма вопросами, як тіж охороном іх меншыновых прав.

Соймова Комісия Нацийональных і Етнічных Меншын то окрема комісия од Спільной Комісиі Уряду і Нацийональных та Етнічных Меншын, яка діє на основі закону з 2005 р. о нацийональных і етнічных меншынах та реґіональным языку з 2005 р. В склад СКУтНіЕМ входят представникы уряду влады і репрезентанты поєдных нацийональных і етнічных меншын. На лемківску етнічну меншыну припадают два місця в Спільній Комісиі.