Новый документ о Андрійови Манайлови з продукції Duna TV

Мадярьско стало уж в часі бывшого режіму, але пак і по політічных змінах, котры почали в Европі у 1989-ім році, новым домовом про доста підкарпатьскых русиньскых родин, котры суть представителями нашого умелецького і інтелектуалного жывота.

Меджі такых представителів належыть і малярь, ґрафік а общественный русиньскый діятель Андрій Манайло, якый жыє в місті Вац, і котрый є днесь узнаваным художником нелем в Мадярьску, але і далеко за граніцями.

О тім факті свідчіть і то, же на кінцю марца 2024-го року мадярьска публічна телевізія Duna TV, в рамках проґраму Rondo, одпремєровала документарный портрет під назвов Художник Андрій Манайло: Од русиньского коріня – ку абстракції.

Андрій Манайло народив ся у 1970-ім році, а до Мадярьска перебрав ся жыти в році 1991. Належыть до славного роду русиньскых малярів – його дідо Федор Манайло належав меджі основателів русиньской Підкарпатьской малярьской школы, продовжовав у тім кумшті, а так само став вызначным малярьом і його отець Іван Манайло.

Як сам Андрій Манайло говорить, основы малярьского кумшту дістав у „родинній школі“. В документі, котрый чутливо, аж інтімно приступать ку жывоту і творчости художника, Манайло бісідує, же як 6-річный хлопець ішов з дідом Федором на пленер в Карпатах, де выникнув його першый образ.

„Намагав єм ся намальовати отару овець. Не дуже подарили ся мі. Втогды підыйшов ку мі дідик і – так ся мі виділо – запхав пензлик за шором у вшыткы фарбы на палеті, і дакілько бравурныма мазками ожывив вівці на полотні.“

Вытварне уменя пак штудовав у роднім Ужгороді, у Львові але і на Санкт-Петербурзькій академії.

В документі з продукції мадярьской Duna TV годны сьте ся дізнати, як суть його творы, днесь вже меджінародно узнаваного художника, іншпірованы русиньсков народнов културов і родинныма традіціями, як капчать традічны елементы із гляданьом модерных форм кумшту, але і то, же одкырвать про себе і можливость творіня скулптур попри мальованю, котре є про його творчость фундаменталным.

„Про мене мальованя – то радостный, майже танечный процес, де вольно течуть фарбы і радость жывота,“ говорить Манайло у філмі.

Документарный філм Художник Андрій Манайло: Од русиньского коріня – ку абстракції, приближыть зрітелям і його путь до абстракції, котра, за його властныма словами, почала ціклом Бытіє, якый быв присвяченый його жывотному юбілею, кедь святковав 50 років.

Но спомяне і далшы ціклы як Вібрації душі, Лазурный берег ці Півночный джез, котры наперек тому, же выникали по тім, што почав путовати по світі і внутрішньо одкрыв ся тым чуджім впливам, все сохраняють собі і „вібрації Підкарпатя“, котрыма є овпливненый од свого народжіня, і то, як властно соєдинять ся в його творчости минувшына із художным языком сучасности.

Дукументарный філм, котрый презентує Андрія Манайла, собі теперь можете посмотрити і на його каналі в службі Youtube з русиньскыма тітулками.

Припоминаме, же Андрій Манайло є лавреатом веце нагород, і його творы суть в збірках дакілько ґалерій в Мадярьску ці на Україні. Выставы мав і на Словакії, але і в далшых країнах Европы, наприклад у Франції.

Анґажує ся і в русиньскім возроднім русі, так в Мадярьску, як і на меджінародній уровни, стрітити го мож і на Світовых конґресах Русинів. У 2019-ім році быв Андрій Манайло єдным із основателів Націоналной премії за русиньске уменя імени Івана Манайла Pro Arte Ruthenorum,  і в рамках той премії діє як голова журі.