Новы власти Руской Бурсы выбраны

Днес, 5. марця 2016 р., по 10.00 год. зачало ся каждорічне загальне зобраня членів Стоваришыня Руска Бурса в Ґорлицях. То засіданя, на котрым члены принимают мериторичны і фінансовы справописы з діяльности орґанізациі за 2015 рік та выберают новы власти общества на річну каденцию.

Напочатку, дотеперішній ведучий – др інж. Павел Малецкій, нич зачал офіцияльне засіданя, попросил присутных о минуту тишы, споминаючы бурсаків, котры одышли од нас в 2015 р. Перший з них то выхованок передвоєнной Руской Бурсы – Семан Карпяк (сын Максима Карпяка, єдного з поневоленых в австрийскым концентрацийным лаґрі в Талергофі). Другій то Михал Коцур (1946-2015), спілоснователь реактивуваной в 1991 р. орґанізациі і долголітній член стоваришыня, член заряду общества і вельолітній адміністратор будинку.

Пак, за пляном, зачало ся загальне зобраня. По представліню справописів, присутны члены приняли іх мериторичну і фінансову част, та справопис Контрольной Комісиі, наконец заголосували за принятьом абсолюториі одходячому зарядови.

Наступным пунктом загального зобраня были выборы новых власти Руской Бурсы. На другу запоряд каденцию ведучым заряду остал др інж. Павел Малецкій. Окрем нього, присутны на зобраню бурсакы выбрали членів заряду: Даміана Трохановского (заступник ведучого), Наталию Малецку-Новак (секретар), Богдана Ґамбаля (скарбника), Андрия Трохановского і Адама Шевчыка. До Контрольной Комісиі на річну каденцию вошли: Мирослав Пелехач (ведучий), Варвара Дуць і Миколай Падухович.

По выборах складу Головного Заряду і Контрольной Комісиі, члены Стоваришыня зачали дискусию над статутовыма змінами і найблизшыма та дальшыма плянами Руской Бурсы.