Новы книжкы од RuthenicArt

Накладом выдавничой офіцины RuthenicArt што якысий час печатаны сут новы публикациі, тыкаючы шырше-узше русиньскых справ. В попередніх статях інформували сме м.ін. про промоцию книжкы Ванівка та Забытий Лемко з Коросна (про Модеста Гумецкого). Окрем того, в нашым інтернетовым склепі оферуєме Вам до придбаня книжкы Лемкы в давных описах, Переселіня руского населіня з коросняньского повіту в 1944-1947 роках, Лемківска земля перед пілвічом, та Коросняньска Русь. Шкіцы і стидия на тему лемківского «острову». Днес хотіли бы сме запрезентувати дальшу част публикаций од выдавництва RuthenicArt, котры были напечатаны того рока і перше.

Зачынаючы од найсвіжшой книжкы про неістнуюче лемківскє село пн. Смеречне на Лемковині. Спомины і реляциі, треба бы на самым зачатку написати, же то книжка єдного автора – Александра Худика, котрий крыє ся за псевдонімом Александер Грабскій. Автор то Лемко, народжений початком 30. років ХХ ст. в селі Смеречне, котрий приводит чытачам своі спомины. Як пише: Toто, што єм перешол вчас гітлерівской окупациі 1939-44, не даст ся николи забыти. Паскудне зневоліня, розлукы діти, родин, жертвы, кривды, лапанкы, концлаґры, моральны страты і конец-кінцьом втрата цілого жытьового доробку. […] по войні взяли нас, бескідскых Лемків, за здрадників властной повоєнной державы. Як мож про тото не написати, же не были сме здрадниками, а стали сме ся жертвами сталиновской ідеолоґіі. Смеречне то днес порожній простір природы. Село являло ся маленькым, бо находило ся в ним лем кус більше як 30 ґаздівок. Нещестно находило ся оно в так стратеґічным пункті, же вчас обох Світовых Воєн по переході фронту цілком згоріло.

Автором другой публикациі, котра была печатана влони, єст выдатний русиньскій патріота – о. Йоан Поляньскій. Будучий Канцлер Апостольской Адміністрациі Лемковины народил ся 20. січня/януара 1888 рока в лемківскым селі Баниця к. Ізб. По скінчыню основной школы в рідным селі, пішол ся вчыти перше до Ґорлиц, а пак до Нового Санча. В 1903 році Йоан Поляньскій зачал науку в саноцкій ґімназиі, в котрій в 1911 році отримал матуральне свідоцтво. Одтамале в жолтни/октобрі трафил до Грекокатолицкой Духовной Семінариі во Львові і зачал студиі на Богословскым Выділі Львівского Університету. О. Йоан Полянькій то автор обшырной Істориі Лемковины (анґлицка версия доступна гев), котру підписал своім псевдонімом І. Ф. Лемкін – являт ся она доднес єдным з найліпшых історичных джерел про рускых Лемків. Як зазначат в книжці Терниста пут священника. Спомины Канцлера Апостольской Адміністрациі Лемковины – за своі переконаня был вельократно гноблений:  […] В жытю был єм 7 разів арештуваний, в ріжных обставинах, ріжных державах, а єден раз засуджений на кару смерти. За Австриі поневолений был в Талергофі, а по выгнаню Лемків в 1947 році такой до кінця жытя был переслідуваний польском безпеком, за тверде оповіданя ся за правами Русинів з Лемковины. Вмер в 1978 році, похований є в Рогах поблизко Ополя.

Окрем спомненых, на сайті выдавництва RuthenicArt находят ся тіж і другы выданя, котры мож придбати і на нашым сайті. В тым місци выміниме тоты, про котры іщы не анонсували сме. В 2014 році напечатана была книжка про східню част Лемковины пн. Східніма крайцями Лемковины. В інтернетовым склепі RuthenicArt мож тіж придбати передрук Шематизму Грекокатолицкого Духовеньства Апостольской Адміністрациі Лемковины за 1936 рік, котрий был напечатаний м.ін. стараньом o. Поляньского.

Выдавнича офіцина RuthenicArt то дослідничо-выдавничий проєкт, оснований в 2012 році, з теперішньом сідибом в Коросні. Головний напрям його діяльности то промуваня ріжных культур карпатского погранича, з натиском на автохтонічне русиньскє населіня. Печатня своім обсягом заінтересуваня обнимат працы з обшыри етнолоґіі, істориі, моноґрафій місцевости, біоґрафій та споминовой літературы.