Новы мосты над Попрадом і роверовы доріжкы

Мушыньскій мистецкій порталь приносит інформациі про чысленны інвестициі, якы послужат популяризациі серед туристів природной красы і памяток архітектуры Лемковины і Пряшівской Руси. І так, 17. лютого/фебруара т.р. во Дворі Старостів в Мушыні секретарьом штату в Міністерстві Розвитку Польской Республикы была передана умова на реалізацию першого з цілой сериі проєктів пн. «Здроі на польско-словацкым пограничу як познавальна в Европі обшыр реалізуваня здравотной туристикы». В рамках той умовы будут побудуваны роверовы/біциґльовы стежкы, котры получат придуману спільну польско-словацку здройово-купалискову обшыр і спопуляризуют тым самым сіт Попрадскых Здроів як сильний і конкуренцийний реґіон в однесіню до каждого інчого европского курорту. Першым елементом спілпрацы буде побудуваня трансграничных роверовых доріг, котры получат Креницю, Мушыну, Пивничну, Щавницю на Лемковині і Ружбахы, Стару Любовню, Любовняньскы Купелі, Бардиів і Бардиівскы Купелі на Пряшівщыні. В селі Гнєздне при Камюнці тота дорога буде ся лучыла з подібным роверовым шлаком, котрий веде кругом Татр. Надпопрадска дорога попровадит через найціннійшы і найкрасшы хоронены области, нацийональны паркы, памятнкы деревяной архітектуры і природны джерела мінеральных вод. На цілій долгости стежкы будут єднако позначены і пристроєны в єднакы туристичны інсталяциі і повтаряльны елементы малой архітектуры, котры мают быти інспіруваны традицийным русиньскым будівництвом. Концепция позначыня і опису дорогы буде дальшым ефектом плянуваного конкурсу. Стежкы будут вести частинно новыма, а по части істніючыма фраґментами доріг. Як поясняют координаторы, в проєкті мат быти експонувана вельокультурова дідовизна і традициі жытелів Долины Попраду. Цілий роверовий пут буде рахувал праві 230 км, а забезпеченых єст на нього більше як 5 млн зл, з чого 85% буде сфінасуване з европскых ґрантів.

Друга інвестиция, котра причынит ся до розвитку роверовых доріг, єст така, што роверовы доріжкы над Попрадом будут частю медженародного шляку EuroVelo11 (EV11). EuroVelo11 має свій зачаток на Нордкап в Норвеґіі і веде через 11 держав, аж до Атин в Грециі. В рамках признаного ґранту побудувана будут 28 км част медже Мнишком над Попрадом а Мушыном і, што найбільше інтересуюче, дві лавкы (мостикы) през воду медже Андриівком а Малым Липником та медже Леґнавом а Миликом. Плянує ся тіж позначыти дорогу «малоінтенсывного руху» медже Мушыном а Пряшовом на долгости праві 72 км. Дорога буде приспособлена в згоді зо стандардами одповідаючыма сіти доріг EuroVelo. Буде она вела перемінно по польскым і словацкым берегу граничной рікы. Од желізничной стациі в Мушыні тота стежка заведе через міст на другій беріг – на Запопрадя, дале вершком до Леґнавы, пак через лавку до Милика і Андриівкы, зас лавком до Малого Липника, через Сулин до Мнишка і дале до Нового Санча. Буде тіж част позначена лем як роверова дорога – од Малого Липника через гору на Плавницю, Липаны, Сабінів, Великій Шариш до Пряшова. Інвестиция має быти готова до кінця жолтня/октобра 2018 р. В рамках проєкту заплянуваны сут три місця обслугы біциґлистів, сервісовий центр на Малым Липнику та інформацийний пункт про туристів в Сулині.

фото горі – Попрад