Новы членове Выбору про народностны меншныны на Словеньску

В пятніцю 4. юла 2014 р. в просторах Уряду влады Словацькой републікы – готел Бворік – проходило волебне згромаджіня Выбору про народностны меншыны і етнічны ґрупы. Кандідатів на членів выбору і їх заступників пропоновали окремы народностны меншыны через свої орґанізації. Довєдна волили представителі 101 народностных орґанізацій. За русиньску народностну меншыну на Словеньску были за членів Выбору про народностны меншыны і етнічны ґрупы зволены Мілан Мнягончак і Ян Липиньскый. За їх заступників были зволены Петро Медвідь і Мілан Ян Пилип. За Русинів было приголошеных на вольбы (значіть тых, котры мали інтерес пропоновати номінанта і брати участь на вольбах) 12 орґанізацій. Жадна з тых орґанізацій не пропоновала іншых кандідатів.