Новосільскій на конец рока

Помалы ближыт ся конец 2023 рока, а што за тым іде і Рока Юрия Новосільского. Не означат то єднак, што скінчыли ся уж посвячены тому подіі, аж і веце – пару з них будут продолжати іщы в 2024 році.

Од 17. листопада/новембра 2023 р. в столичній Захенті – Нацийональній Ґалериі Штукы мож обзерати выставу пн. «Сакрум і профанум». То експозиция глубоко містична, што дозвалят познати духовый світ выдатного артисты. Презентує штырі сюжеты з творчости артисты: пейзаж, тіло, абстракцию і ікону.

Захента заохочат

«Ціла моя творчіст є втіканьом в метафізику. Іде лем о тото, яка тота метафізика є. То метафізика модерного чловека, котрый втіче в інчый вымір з цілым баґажом своіх емоцийональных пережыть» – чытаме слова Новосільского експонуваны на выставі в Варшаві.

Выстава зрыхтувана з нагоды сотной річниці народин артисты, котру мож обзерати в Захенті, то зоставліня штырьох типів образуваня, што становлят в даякій мірі дефініцию творчости Новосільского. «В каждым з мотивів мож достеречы захопліня ґеометрийом, в котрій заперат ся описуваня духовых і барз реальных пережывань, а тіж містичну, полну символів візию реальности» – пише ся в анотациі выставы.

«Пейзажы компонуваны сут з пласкых, ґеометричных форм, малюваны з ріжных перспектив, приводят на мысель фільмовы кадры» – чытаме дале. Подібні потрактуване є тіло – не є обєктом естетичной контемпляциі, але стає ся ґеометричном формом, «артиста стремил до вказаня усвяченого тіла, выабстрахуваного з земской реальности».

«Третія тема, абстракция, в творчости Новосільского односит ся до найвысшого бытя, до трансценденциі, еманацийом которой є світло» – подає кураторка выставы Анна Будзалек. «В послідній сали маме уж полне вытишыня, єст темно і маме три пронимаючы іконы барз цікаві зоставлены з трьома світскыма, жебы вказати як Новосільскій хотіл стрітити зо собом світскіст з боскістю. То барз важный і браз поважный сюжет в його творчости» – підкрислят кураторка. Ікона то четверта презентувана на выставі тема.

Роботы презентуваны на выставі походят з колекций: Войцєха Фібака, Войцєха Ґжыбалы, Томаша Міхальского, Округового Музею ім. Л. Вычуковского в Быдґощы, Нацийонального Музею во Вроцлаві, Нацийонального Музею в Кракові, Нацийонального Музею в Познані, Нацийонального Музею в Щеціні, Нацийонального Музею в Варшаві, STARAK Collection ци колекциі самого орґанізатора выставы. Выставу мож обзерати до 4. лютого/фебруара 2024 р.

В Ґданьску вказуют выключні «Акт»

Од 9. листопада/новембра тр. мож обзерати в Музею в Ґданьску образ «Акт» з 1978 р. Юрия Новосільского. I лем єден образ. То замірене діяня – образ вказуваный є в рамках циклю выстав «Докладні!», котрым то цикльом музей притігат увагу гости до выбраного твору – кураторы пояснюют його сенс, локуют в шыршым контексті. І хоц предметом анализы є лем єден твір, то самій выставі товаришыт цілый цикль подій – од варштатів білого співу через варштаты малюваня ікон по стрічы з запрошеныма гістми. Єдным з запрошеных є історик др габ. Анджей Зємба, проф. Ягайлоньского Університету. 13. грудня/децембра выголосит прелекцию до темы «Новосільскій в світі східньохристияньского сакрум – сукцесия ци інспірация?». В проґрамі дальшых стріч є іщы стріча м.ін. зо сценоґрафком і антроположком Маґдаленом Мухом ци акторком Малґожатом Абрамович. Образ в ґданьскым Музею є презентуваный до 3. марця 2024 р.

«Юрий Новосільскій. Ту і там»

Єдиным фотоґрафічным упамятніньом Року Новосільского є выстава «Юрий Новосільскій. Ту і там». На експозициі презентуваны сут два комплементарны пізріня на Новосільского зроблены через двох творців. Автором першой сериі знимок є Ян Стичыньскій, ціненый польскій фотоґрафік, якій Новосілького вказує в інтимным, чорно-білым документальным цикли складаючым ся зо знимок зробленых артисті при роботі, в хыжы, на учельни, з приятелами, на улицях Кракова. Вальдемар Здроєвскій – автор другой сериі знимок – хоснуючы тот сам апарат, якым фотоґрафувал Стичыньскій (Rolleiflex 6×6), выбрал ся в подорож слідами Новосільского і спрібувал днес, по веце як десятьох роках од смерти артисты, дополнити цикль Стичыньского. Выставу «Юрий Новосільскій. Ту і там» мож обзерати в Ґалериі Обсервация в Варшаві од 21. листопада до 23. грудня 2023 рока.

На закінчыня – Новосільскій на Замку

Звінчыньом святкувань Рока Юрия Новосільского буде выстава на Королівскым Замку в Варшаві пн. «Штука смотріня. Новосільскій і інчы». Творчіст маляря буде запрезентувана в контексті выбраных творів інчых выдатных артисток і артистів другой половины ХХ столітя, котры в своій творчости піднимали підібны, што Мастер, сюжеты. Запрезентуваных буде коло сто творів і близко сто обєктів, вказаных в діалоґу, а часом в конфронтациі з творами знаных артистів. Вернісаж выставы пройде 5. грудня 2023 рока, інавґуруючый выклад пн. «Маляр ікон як ікона. Юрий Новосільскій – герой і жертва попкультуры» выголосит др Кристина Черні, найбарже знана бадачка жытя і творчости Новосільского, авторка десяток дописів і публикаций тыкаючых артисты. Выставі, што потырват до 3. марця 2024 рока, товаришыти будут додатковы подіі і кураторскы опроваджаня.