Новорічна стріча з Розтоком

Ансамбль «Розтока» не треба представляти. То добрі знана ґрупа на чужыні, а головно в любіньскым повіті, прото же як єдиний в тій адміністрацийній єдиниці презентує фольклор з Лемковины. Окрем выступлінь на вшелеякых подіях, «Розтока» постійно уж, каждий рік орґанізує свою власну подію – новорічну стрічу, на котру просит каждого, но головно любителів іх музыкы, а тіж другы камаратскы ансамблі і артистів. Влони мали сме нагоду быти на Малых Ґавронах близко Рудной, де ансамбль орґанізувал новорічну подію.

Тогорічна стріча пройде дакус пізнійше як влони, бо 4. лютого/фебруара. Зато місце стрічы ся не змінило – то сельска світлиця в Ґавронках. Окрем ґаздів, на подію сут прошены другы артисты. З «Розтоком» буде ся веселила капеля Ваня Олеснєвича – «ОЛЕ», котра напевно выспіват неєдну русиньску пісню, бо і сам єй ведучий то щырий Лемко. Дальше выступит ансамбль «Осетнополянє» з Осетниці – іщы єдны цимборы лемківской «Розтокы».

Ансамбль «Розтока» чыслит 22 співаків (головні жены) та 4-особову капелю. Артисты, окрем знаных лемківскых пісен, мают в репертуарі творы з украіньского, словацкого і польского фольклору. Стараньом Центру Культуры в Рудній, ансамбль купил в 2011 році традицийны лемківскы кроі, в котрых презентує ся не лем на лемківскых подіях (Розтоку часто мож видіти і на Лемківскій Ватрі на Чужыні). Ведучым лемківского ансамблю є Владимір Зорило.