Новий систем обслугы дотаций МАіЦ

Згідні з заповідями, Міністерство Адміністрациі і Цифризациі од 2015 рока вводит новий інформатычний систем, котрий мат такой цілком заступити традицийну кореспонденцию помедже МАіЦ а бенефіциєнтами дотаций, презначеных на охорону, підтриманя і розвиток достоменности нацийональных і етнічных меншын.

Новий систем, якій являт ся частю інтернетового систему ePUAP до обслугуваня офіцияльных документів складаных до урядів, достал назву ESOM2. Позволит він на зложыня внесків о міністерияльны дотациі через інтернет, враз з цифровым потверджыньом. То не конец його функций, бо через нього буде тіж переходила дальша кореспонденция: анексы, справозданя, оціна справоздань і вшытко, што звязане єст з даном дотацийом.

Остатнім елементом выміны кореспонденциі, котрий на тым етапі не повело ся іщы перенести на інтернетовий пут, єст ручний підпис під отриманым цифровым потверджыньом, якій винен быти одосланий традицийном почтом, або зложений особисто в Міністерстві Адміністрациі і Цифризациі.

Для орґанізаций, котры хотят быти бенефіциєнтами міністерияльных дотаций, будут проведены школіня з обслугы нового ситему:

• І етап: лютий-марец 2015 р.
• ІІ етап: май-червец 2015 р.

ESOM2 заступит дотеперішні, традицийны способы комунікациі з МАіЦ в 2015 р., т.є. буде ся тыкал інтернетового обслугуваня внесків і дотаций на 2016 рік.

Радийо лем.фм, в порозумліню з творцями систему і урядниками МАіЦ, зголосило свою готовіст до тестуваня функций нового інформатычного систему ESOM2, нич його фінальна версия остане передана до систему ePUAP.