Новий номер «Маґуры»

На сайті Маґурского Нацийонального Парку мож найти найновший номер, 2(5) липец-вересен 2016, квартальника пн. «Маґура» – бюлетину МНП.

Любителі карпатской природы найдут в ним м.ін. допис про метеликы в Низкым Бескіді, з поясніньом, котры особникы можеме обсервувати в даных місяцях і якы мают звыкы, напр. де люблят пересідувати. Єст допис про хоронены рослины МНП, з котрых найціннійшы роснут на одкрытых обшырях і на луках в Крампняньскій та Поляньскій Гутах, Жыдівскым і Вільшни. Находит ся тіж в «Маґурі» статя про лемківскє будівництво, шак цілий простір МНП находит ся на обшыри Лемковины. В дописі тім поміщено опис од выбору місця під будову хыжы, через наступны етапы повязаны з добераньом дерева і дальшыма. Описано тіж, з якых поміщынь складала ся хыжа і што входило в склад загороды. Нашла ся в публикациі і лемківска леґенда про єдного ґазду, Фецка, зо Свіржовы Руской, котрий хотіл оциґанити чорта, а выникнули з того поламаны дерева під Марешком. Окрем того, поміщено в «Маґурі» лавдацию посвячену Янови Шафраньскому – головному творцьови і першому директорови МНП, выголошену вчас торжественного одкрытя пропамятной таблиці 1. жолтня/октобра 2015 р.

За тым мотузком можете побрати і почытати найновший номер «Маґуры».