Новий номер часопису «Карпатскій Соспільно-Культурний Перегляд»

Явил ся новий номер дармового часопису «Карпатскій Соспільно-Культурний Перегляд», котрий вказує ся в рамках проєкту «Шляк волошской культуры».

В новым чыслі часопису находит ся вельо тем повязаных з обшырю карпатского польско-словацкого погранича. Найдеме отже в «Карпатскым Соспільно-Культурным Перегляді» статі описуючы традициі, забобоны, велийны звыкы та ріжнорідніст страв на святочных столах. Є про материяльну спадковину, котру дали нам давны жытелі Карпат – бойківску архітектуру і про потребу хороніня давной, реґіональной деревяной архітектуры. Найдеме в найновійшым чыслі перегляду і допис про кривульку, важний елемент бабского облечыня, і про находячы ся по словацкій страні обєкты, што были вписаны на листу ЮНЕСКО. В тым выданю мож почытати тіж о Музею Лемківской Культуры в Зындрановій, камінных слідах шлезской істориі та о Владиславі Оркані – кус забытым поеті.

Проєкт «Шляк волошской культуры» реалізуваний єст од 1. квітня/апріля 2017 р. і буде тырвал до 30. жолтня/октобра 2018 р. Головном його цілю є збільшати рівен выкорыстаня потенциялу польско-словацкого погранича за справом дідицтва волошской культуры. Ведучым партнером проєкту є Стоваришыня для Розвитку і Промоциі Підкарпатя «Про Карпатя».

Часопис мож одобрати в сідибі Стоваришыня «Про Карпатя» в Ряшові або в партнерів проєкту.