Нове выдавництво про церкви

Стоваришыня Про Карпатия печатало публикацию Лексыкон деревяной сакральной архітектуры підкарпатского воєвідства.

На обшыри того же воєвідства находит ся більше як 300 сакральных деревяных объєктів, побудуваных перед 1950 роком, а в книжці поміщено характеристыку аж 256 примірів той архітектуры. Докладні то в книжці найдеме опис: 149 церкви, 96 костелів і каплиц, 57 окремых дзвінниц та єдного протестантского збору. Описы прикрашено 1200 знимками, головні сучасныма, але є тіж пару архівальных. До каждого опису додано короткє резуме по анґлицкы та украіньскы.

Остатнім елементом публикациі єст додаток, в котрым поміщено короткы гасла про объєкты, якы не заховали ся до днес, сут то м.ін. церкви, костелы, зборы, синаґоґы і дзвинниці. Помішено 535 архівальных знимок, вказуючых цілы будовлі, або іх фраґемнты, ци середину. Книжка то в сумі 408 сторін.

Книжку мож купити безпосередні в сідибі Стоваришыня в Ряшові (Рынок 16/1), а неодолга буде мож замовити през сайт выдавництва Карпатия www.carpathia.net.pl.

Серед примірів сакральной деревяной архітектуры в підкарпатскым воєвідстві, находит ся шіст особливо цінных церкви, якы вписано на Листу Світового Дідицтва ЮНЕСКО, з котрых 2 то лемківскы церкви – в Смільнику та Туряньску.

Стоваришыня Про Карпатия, якого полна назва то Стоваришыня для Розвитку та Промоциі Підкарпатя Про Карпатия, діє од 2004 рока. Веде вельо проєктів о державным, або меджедержавным засягу, актывізуючых локальну соспільніст та уряды. Веде тіж дослідничу, выдавничу та ґосподарчу діяльности. Більше про Стоваришыня найдете на сайті www.procarpathia.pl