Нова книжка – Простерто на Підкарпатьскій Руси

Як інформує на своїм сайті Общество приятелів Підкарпатьской Руси (Společnost přátel Podkarpatské Rusi), орґанізація в остатніх днях выдала свою нову пулбікацію в чеськім языку під назвов Простерто на Підкарпатьскій Руси (Prostřeno na Podkarpatské Rusi). Публікація добра про тых, котры бы хотіли посмаковати собі на підкарпатьскій русиньскій кухні.

Збірку, як сайт інформує, „карпаторусскых“ рецептів приготовила Даґмар Бжезінова із общества. До книжкы приспіли і приятелі ці чітателі часопису Podkarpatská Rus, якый Общество штирираз до рока выдавать, і в котрім редакція кликала ку співпраці дакілько раз. Просьбы были выслуханы і „до редакції ходили рецепты родічів і властны рецепты на приготовліня русиньскых і підкарпаторусскых страв“, інформує сайт. Книжка є обогачена фотоґрафіями Їжіго Гавла і авторкы книжкы, котра вшыткы стравы нелем сама спробовала, але таксамо фотоґрафічно звічнила.

Общество приятелів Підкарпатьской Руси (Společnost přátel Podkarpatské Rusi) є обчаньскым здружіньом, котре было засноване у 1990 році і дійствує в Чеській републіці. Окрім іншого є і членьсков орґанізаційов Світового конґреса Русинів за Чехію. Ідейово одкликує ся на діятельность Клубу приятелів Підкарпатьской Руси, котрый быв заснованый в міджівойновім періоді в Братіславі. Цілями общества суть проглубованя односин зо жытелями і орґанізаціями Закарпатьской области Україны, бывшой Підкарпатьской Руси, підпора Русинів на теріторії Чехії ці популарізація Русинів в Чеській Републіці. Общество выдавать і часопис „Podkarpatská Rus“, но і далшы неперіодічны публікації.

Книжку мож обїднати на адресі: Dům nár. menšin, SPPR, Vocelova 3, Praha 2, 120 00, або через мейлову адресу J.V.Havel@seznam.cz.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА