Нова книжка про діти

З выдавництва Академії русиньской културы Словеньской репулікы в тых днях вышла нова книжка русиньскых загадок під назвов Здогадай, школярику в авторстві Юрка Харитуна.

Знамый русиньскый поет Юрко Харитун быв за свою дотеперішню творчіть оціненый уж трьома преміями – Меджінароднов Премійов Александра Духновіча од Карпато-русиньского центра в Америці і Премійов Александра Павловіча, котру му уж двараз уділив Літературный фонд у Братіславі.

Харитун перед вступом до літературы ся інтересовав збераньом фолклору про дітей: колысковых співанок, гаданок, гер ітд. До русиньской літературы вступив збірков віршів Гуслі з явора, котра вышла у 1995 р. Його поетічны збіркы суть наповнены жальом і наріканьом поета над одорваньом од родного краю – Стариньской долины, котра была выселена з причіны будованя водной програды. Здогадай, школярику – то перша книжка автора присвячена дітям. Книжка є повна ілустрацій малярькы русиньского походжіня Анны Ґайовой, котра уж ілустровала наприклад і русиньскы учебникы про основны школы.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА