Нова книжка Монікы Ліс – каждий може помочы єй выдати

Уж невельо остало. І жебы зобрати потрібну авторці суму, і часу, котрий передвиджений єст на інтернетову кравдфандінґову акцию, цілю выдати найновшу повіст Монікы Ліс «Конец світа». Популярна в остатнім часі збірна форма помочы сфінансувати даякій проєкт в тым примірі кінчыт ся 9. квітня/апріля 2017 рока. Зато – неє што ждати!

«Конец світа» (в польскым ориґіналі Koniec świata) то повіст для молодых, котра ся діє в більшости на бєщадскых путях. Найдете там не лем захопліня красом природы той части Карпат, але і деякы історичны інформациі, о котрых сама авторка пише нам, же не могла бы не спомнути і о холерній Акциі Вісла. Повіст зачынат ся приіздом Меланіі, котра іхат на музычний фестіваль, де бере участ в конкурсі. Там другє місце здобыват дівча, співаюче верш Петра Мурянкы…

В тым місци може помочы каждий. Авторка, Моніка Ліс, любителька Карпат і бесідуюча о собі, же хворіє на невылічыму хвороту – лемколепію, запрашат каждого охочого підпорити выданя єй книжкы, але за тото оферує вельо пакєтів, котрыма подякує за Вашу поміч. На кравдфандінґовым сайті mintu.me (клікаючы в мотузок перенесете ся одраз на порталь) можете выбрати суму, яком мож спомочы тоту ініциятиву, достаючы мапу, книжку з автоґрафом авторкы, або вельо меньшых і більшых стильовых рукотворных ґаджетів (на декотры з них позерайте за сайтом manufakturamoniki.pl), а для найщедрійшых спонсорів найде ся вельо інчых атракцийных нагорід. На ден писаня той статі, до мінімум, котре выстартує проєкт, остало лем… парусот злотых, хоц і більша сума, як тота вымагана, тіж поможе сфінансувати дальшы кошты – коректу, податкы і др.

Моніка Ліс то молода авторка, котра дост недавно дознала ся о своім лемківскым походжыню. Дознала ся о тым при нагоді – уж по тым, коли зышла з гірскых пути, пак зачала співати в ансамблю Клюб деМоль, жебы при велиі, оповідаючы родині о захопліню лемківском культуром, єй дідо несміло зачал бесідувати о своіх лемківскых коренях. Тото одкрытя дало лем імпульс Моніці до дальшых діянь. Іщы барже заанґажувала ся в творчу діяльніст, што буде видно уж онедолга, як лем буде выдана платня «Танці душы», котра єст результатом здобытой враз з Петром Мурянком (в форматі мастер-ученик-проєкт) Нагороды Малопольского Воєвідства Ars Quaerendi.