Нова книга о Підкарпатьскій Руси меджі роками 1919 – 1939

Як інформує Общество приятелів Підкарпатьской Руси на своїм офіціалнім сайті, на книжковый рынок дістала ся нова інтересна публікація присвячена історії Підкарпатьской Руси в чехословацькім періоді.

Іде о нову чесько-анґліцьку публікацію під назвов Чехословацька „колонізачна“ політіка на Підкарпатьскій Руси меджі роками 1919 – 1939 (оріґ. Československá „kolonizační“ politika na Podkarpatské Rusi mezi lety 1919 – 1939), котрой автором є Ерік Лукас.

Автор в трьох капітолах занимать ся конштітучноправным вопросом Підкарпатьской Руси в рамках Чехословакії, і його розвитком почас 20-ох років сполочной історії. Перша капітола занимать ся проблематіков і значіньом колоніалізма і імперіалізма в конфронтації з поставліньом Підкарпатьской Руси в новій републіці.

В другій капітолі є описаный історічно-політічный розвиток того реґіону од 1848-го року аж до анексії – нового приєднаня до Мадярьска в марці 1939-го року. В послідній капітолі автор курто занимать ся особов Томаша Ґаріка Масарика і його історічным і сучасным значіньом про тот край. Окремы капітолы суть доповнены множеством знимок, і на кінцю публікації є ціла фотоґалерія розділена подля окремых місць в тім реґіоні.

Книга не є доступна у книжковых дістрібуторів, но мож єй купити посередництвом імейлового контакту на адресі masdem.tajemnik@gmail.com.