Нова кандидатка на члена Спільной Комісиі

Днес, офіцияльным писмом з Міністерства Адміністрациі і Цифризациі, дознали сме ся, же з причыны більшой кількости кандидатів пропонуваных лемківскыма орґанізациями, міністер дал орґанізациям під консультацию кандидатуру др Мирославы Копыстяньской на члена Спільной Комісиі Уряду та Нацийональных і Етнічных Меншын (СКУтНіЕМ).

Хоц не вшыткы з 14 орґанізаций односят ся до лемківской меншыны (!), та, за процедуром, повинни заявити свою опінію о пропонуваній міністром кандидатці до 25. липця 2014 р.

Од хвилі основаня СКУтНіЕМ (перше засіданя – 21 ІХ 2005 р)., репрезентантами Лемків были др габ. Олена Дуць-Файфер і Штефан Гладик. По влонишній бурі, звязаній з браком порозумліня медже лемківскыма (і інчыма!) орґанізациями, котры партиципуют в выборах членів Комісиі, дотеперішні репрезентанты остали одкликаны. 1. червця тр., в місце Штефана Гладика, премєр ПР Дональд Туск покликал др габ. Штефана Дудру, професора Зеленогірского Університету, а в місце др габ. Олены Дуць-Файфер пропонувана єст кандидатура др Мирославы Копыстяньской.