Нова «Бесіда» уж до придбаня

Початком 2025 р. явил ся першый тогорічный номер часопису Стоваришыня Лемків – «Бесіда», ч. 1 (202) за місяці січен/лютый 2025 р.

В номері прочытаме м.ін. статі:

• Севериян Косовскій, Мария Кобані: «Не бесідує ся в тій хвили нич о Явожні»;
• Наталія Малецка-Новак, Антоний Крог з Нагородом Міністра Культуры і Нацийональной Спадковины за роботу для народной культуры;
• Севериян Косовскій, Русиньскы вчены взяли участ в Конвенциі ASEEES в Бостоні;
• Петро Медвідь, На Лемковині одсвяткували Ден Русинів Польщы;
• Андрий Ковальскій, Престіжный концерт «Ластівочкы» в Народовым Форумі Музикы во Вроцлаві. 

Часопис традицийні одкрыват част «Новины, не новины – не лем з Лемковины». Єден з шыршых дописів посвяченый єст ювілейови долголітнього спілредактора часопису «Бесіда» – фотоґрафіка Петра Басалыґы, якому выполнят ся 70 років. Петро Трохановскій описал жытя і творчу роботу Ювіляря. Своі жытьовы ювілеі, о якых споминат ся в номері, як раз в лютым/фебруарі т.р. святкуют тіж Маестро Ярослав Трохановскій (85 років), проф. Павел Роберт Маґочій (80 років) та Анрий Трохановскій (40 років), член Світовой Рады Русинів, член Стоваришыня Лемків і Стоваришыня «Руска Бурса» в Ґорлицях.

В части «Давна і сучасна русиньска творчіст» был опубликуваный першый фраґмент тлумачыня зробленого Петром Криницкым – то «Алісины пригоды в Чудержаві« (в ориґіналі «Alice’s Adventures in Wonderland»; в польскым перекладі – «Alicja w Krainie Czarów»). Петро Криницкій ял ся перевести дальшый шедевр світовой літературы на наш рідный язык. Як раз в «Бесіді» будут одтепер друкуваны поєдны фраґменты тлумачыня.

Двомісячник «Бесіда» то часопис Головного Заряду Стоваришыня Лемків, выходит од 1989 рока, присвяченый єст збережыню істориі, культуры і языка Лемків, інформуючый о жытю нашой і братніх нам соспільности, плекаючый вірні надіі прадідів і вітців.

«Бесіду» мож почытати в бібліотеці Руской Бурсы в Ґорлицях. Ґазета є тіж доступна в локальных Кружках Стоваришыня Лемків в Польщы.

Найновшый номер, як тіж архівальны номеры часопису «Бесіда» годны сте придбати в електронічній версиі по сконтактуваю з выдавцьом на сайті www.stowarzyszenielemkow.pl.