Нова «Бесіда» – доступна про Вас

Стоваришыня Лемків напечатало дальшый номер свого часопису – «Бесіда», ч. 4 (175), на місяці липец-серпен. В свіжым выданю можеме чытати м.ін.:

• Наталія Малецка-Новак, Сара Кушвара: Мрию даколи малювати на Лемковині;
• Ольга Пелехач, Лемковина очами фотоґрафа Патрика Бєґаньского;
• Петро Трохановскій, Цінне одкрытя «Маґурича» на цмынтері в Волівци;
• Петро Медвідь, Літні семінары з карпаторусиністикы;
• Наталія Малецка-Новак, Тот світ не загынул – будут называти нас Лемками;
• Андрий Копча, 2:0 для… коронавіруса. Друга імпреза Стоваришыня Лемків переложена… наразі;
• Петро Трохановскій, Ювілей з «копом», але ту з адекватном;
• Анна Рыджанич, Поетеса пізного дебюту (до 100. річниці народжыня Меляніі Собин);
• Анна Кырпан, Антонич: сподіванкы і несподіванкы;
• Павел Малецкій, Богдан Ґамбаль (1965-2020). Русиньскій інтелектуалиста, візийонер і політик.

Хоц пандемія не одпущат, теперішнє чысло «Бесіды» вкінци вернуло до постійной части «Новины, не новины – не лем з Лемковины». Іщы в останім номері, першый раз од тридцет єден років выдавничой істориі часопису, не нашли ся ниякы інформациі з обшыри культурно-соспільных подій.

В выданю чытати мож выімкы з текстів публикуваных в інчых редакциях. Так польскоязычных, як і словацкых. При тексті Анны Кырпан, посвяченым Богданови Ігорьови Антоничови, поміщены сут стишкы поеты, переведены до лемківского языка.

Найсмутнійша про нашу редакцию радия ЛЕМ.фм єст актуальна част «Одышли од нас / Попращали мы». Споминат ся в ній нашого приятеля, реактиватора Общества Руска Бурса в Ґорлицях і думкодавцю першого лемківского радия, Богдана Ґамбаля (1965-2020). Окрем статі Павла Малецкого, своє особисте слово подал ведучый часопису – Петро Трохановскій.

В ґазеті як все і інчы тексты, поезия, а і шыковне Амрозове казаня. Новый номер доступный єст в версиі онляйн на сайті Стоваришыня Лемків.

Двомісячник «Бесіда» то часопис Головного Заряду Стоваришыня Лемків, выходит од 1989 рока, присвяченый єст збережыню істориі, культуры і языка Лемків, інформуючый о жытю нашой і братніх нам соспільности, плекаючый вірні надіі прадідів і вітців.

«Бесіду» мож почытати в бібліотеці Руской Бурсы в Ґорлицях, котра отворена єст од понеділька до пятниці в год. 08.00-16.00, або по індивідуальным догваріню в інчым терміні. Ґазета є тіж доступна в локальных Кружках Стоваришыня Лемків в Польщы.