Нова авдиция в ЛЕМ.фм – «Одомаш» – кажда середа, 20.05 год.

Одднес стартуєме з новом авдицийом в нашым першым лемківскым радию ЛЕМ.фм! Редактор Севериян Косовскій буде Вас гостил в проґрамі «Одомаш». Робота роботом, але і погостити ся треба.

В нашій штотыжньовій стрічы будеме гостити ся предовшыткым при добрій музиці. Знате ня головно з проґраму «Чірч Ґрамофон». Не забуду на вірных любителів той музикы – обіцюю.

В проґрамі окрем штотыжньовой інформациі про радіст і смуток, будеме інформувати про вшелеякє в части «З чірчаньского подвірця». Коли уж насилиме душу забавом, так не бракне ани доброй старой лемківской пресы. Давны нашы ґазеты приносят фурт актуальны темы. Про саджыня комперів ци яруваня в поли тіж буде.

«Сміх і правда» то тото, што остало з давных календарів Ваня Гунянкы. Зазриме і до них, жебы посміяти ся з того, што в середині тыжня спричынит, же іщы дотырваме до його кінця.

Зачынаме одраз по «Новинах радия ЛЕМ.фм». Проґрам нажыво – заохочам писати на seweryjan@lem.fm.

Красні прошу.