Нова аплікация на смартфоны

Хоснувателям смартфонів явила ся недавно нова аплікация в польскій і анґлийскій яыковых версиях, названа Gorlickie, Sądeckie, котра, як мож ся додумати, односит ся тіж до реґіону Лемковины. Пониже опис функций і змісту.

По інсталяциі, аплікация звідує, ци загнати полний зміст (ок. 30 МБ)? Кєд мате іщы свобідний мобільний трансфер, або находите ся в обшыри сіти Wi-Fi, вартат го загнати одраз, жебы потішыти ся вшыткыма доступныма функциями проґраму – м.ін. локалізацийом і мапами. Товды не треба буде бояти ся о доступ до інтернету, будучы в даякым місци, до котрого заведе нас проґрам, бо напр. ідучы з Вірхні до Баниці, скорше взриме сідячого на баницкым вершку Амроза, як найдеме обшыр мобільного інтернету, а не все на трасі найде ся ґазда, сіючий доокола хыжы безпроводний доступ до сіти.

Напочаток, видиме простий, але приємний оку ґрафічний інтерфейс з начальным мені, в якым найдеме поєдны темы: Місця, Трасы, Квесты, Подіі, Мапа, Локальны маркы, Плянер і Сканер QR–кодів. Не знам, на што придана послідня функция, але як прочытате пониже, і мериторычний зміст вымагат іщы допрацуваня і пошыріня. Зато займу ся тым, што уж мож перезріти.

Місця

То на ден тестуваня аплкациі найбарже розбудуваний розділ. Находят ся ту тематычні поґрупуваны місця Сандеччыны і Ґорличчыны поділены на катеґориі: Забыткы, Природа, Нічлігы, Кулінариі, Спорт і Рекреация, Костелы, Церкви, Музеі і Ґалериі, Інчы.

Трасы

Авторы проґраму пропонуют хоснувателям ріжны трасы прогульок, описаны долгістю і трудністю та дедикуваных для переміщаня ся піше, ровером, або автом.

Квесты

За тым таємным словом (од анґ. quest – в польскым жарґоновым языку компутеровых грачів значыт коротку місию до выполніня в грі) находят ся короткы пропозициі трас. Ріжнят ся од спомненой выже катеґориі тым, же обнимают єдну місцевіст з описом, што в ней найбарже цікаве до обізріня.

Подіі

Ту, певно, найдут ся даколи подіі звязаны з реґіоном. Днес видно лем єдну.

Мапа

Хоц при старті проґраму загнал єм цілий пропонуваний зміст на телефон, то мапы, по мойому, і так сут он-ляйновы. Так, ци так, помагают окрислити, де находят ся приводжены в аплікациі місця. Інтересуючы сут деякы назвы, по на мапі видиме названя присілків, напр. Вєрхня (Wierchnia) в Ґладышові. Чудеса. Може то нелемківска транскрипция з давного Вѣрхня?

Локальны маркы

Ту находят ся найбарже характеристычны елементы Сандеччыны і Ґорличчыны, обняты як темы, котры мают притягнути туристів, напр. Вельокультуровіст: Ляхы, Погіряне, Чорны і Білы Ґурялі, Лемковина. Чом не Лемкы? Мя не звідуйте

Плянер

То наша підручна лада з запамятаныма елементами аплікациі. Штоси в роді “улюбленых”, або “записаных на потім”.

Загальний вид

Аплікация не грішыт богатством змісту. То радше загальна інформация для хоснувателя, якій перший раз чул о тым реґіоні, але напевно не для осіб, котры інтересуют ся Сандеччыном і Ґорличчыном. Може то уж вид нашых часів, же не треба за дуже новин, а кєд уж так, най будут они загальны, не примушаючы до думаня.

На тестуваным смартфоні Samsung Galaxy Note II, хоц то не найновша машына, але з реляцийні добром гардверовом конфіґурацийом, аплікация ходит, по мойому, дост тяжко. Загнаний зміст, предовшыткым знимкы объєктів, вчытуют ся допіро по парудесятьох секундах. Часом аплікация сама з себе вертат до головного мені.

В проґрамі напевно бракує інформаций про Лемковину. Не зато о тым пишу, же мі іх бракує, але кєд тема обнимат дост загальні представлены факты, та бодай лем загальні могла бы інформувати о Лемках. Може єст тото плянуване в наступных актуалізациях, але тепер лемківскых тем неє. Окрем того, авторы проґраму забывают, же єдном з прикмет Ґорличчыны сут двоязычны назвы сел на Лемковині. Тото одріжнят єй од вельох інчых реґіонів Польщы. Інча справа, же мериторычны блуды, як спомнена Вєрхня, приходят товды, коли проґраміста/автор аплікациі не мат полного знаня о тым, што робит. Не тото вадит, бо іщы ся такій не вродил, жебы знал вшытко, але часом дерево вартат зачати обзерати од коріня.

Але, там. Не одраз Краків збудували. Ждеме на дальшы актуалізациі змісту. 🙂

Аплікация доступна на смартфоны з системом Андроід і iOs.

Враз з збільшаючом ся популярністю “мудрых телефонів” (смарт – анґ. мудрий) і зменьшаючыма ся коштами мобільного інтернету, котрий єст необхідным елементом, жебы полністю смартфон схоснувати, і мы выдали просту аплікацию, з котром ден і ніч, літом і зимом, вчера, днес і заран – можете слухати радийо ЛЕМ.ФМ. Тепер доступна версия на систем Андроід (за мотузком), а неодолга принесеме єй для хоснуючых інчы мобільны системы.