Номінуваны в плебісциті Краківской Ґазеты – Персона 2017 рока

Краківска Ґазета, як каждий рік, оголосила плебісцит, в котрым выберана буде Персона 2017 рока. Серед зголошеных в тогорічній едициі нашли ся особы, якы наштоден діют в обшыри лемківскых справ на териториі ґорлицкого повіту.

Номінуваны сут поділены подля парох катеґорий. Найдеме особы спосеред Культуры, Соспільна і благодійна діяльніст, Самоурядніст і локальна соспільніст та Бізнес. В катеґориі Соспільна і благодійна діяльніст номінуваний єст парох штырьох сел на Лемковині, о. др Акрадий Баранчук. Священник служыт в православных парохіях в Ґладышові, Реґєтові, Ждыни та Конечній. Окрем того, штоден продолжат благодійно-соспільну діяльніст в Православным Осередку Милосердя Елеос в Ґладышові. Його діяльніст не завершат ся лем до православных вірных, бо каждому, кого треба сперти, звертаючому ся до осередка, ґладышівскій парох все старат ся допомочы. Днес, простір діяня Елеосу то орґанізуваня занять і таборів для неполносправных діти і дорослых, а од 2002 рока тіж безлпатна выпожычальня інвалідскых візків, регабілітацийных постели і інчого медычного ґратя. Номінация о. Баранчука є за розвиток і розбудову осередка. 

Посеред номінуваных в обшыри Культуры нашол ся Роман Корбич, лемківскій музык, спілоснователь знаного лемківского ансамблю Серенча, якій од 20 років промує лемківску музыку ай спів на домашніх і заграничных сценах. По днешній ден, ґрупа выдала штырі платні, на якых найти мож популярны лемківскы співанкы, але тіж рідко стрічаны народны творы, якы ансамбль старат ся находити в призабытых співниках і аранжувати в модерній композициі. Роман Корбич свою номінацию отримал за зорґанізуваня концерту з нагоды 20. літя діяльности Лемківского Фолькового Ансамблю Серенча та популяризацию культуры на обшыри ґорлицйой землі, за справом веденых ним духовых оркєстр, мажореток і народного ансамблю.

В тій же катеґориі – Культура – можеме достеречы іщы єдну близку Лемкам персону. То Богдан Малеша – аніматор культуры, презес Стоваришыня Любителів Культуры «Персііна», орґанізатор вельох локальных культуральных і інчых подій. Богдана Малешу стрітити мож днес музыкуючого в лемківскых і польскых ансамблях, а за спільны успішно проведены забавы до білого рана вдячны му сут не лем орґанізаторы лемківскых забав, маланок і стріч, на котры приходит з ансамбльом SQID, але предовшыткым особы, котры рішыли станути під вінці. Лемківскы весіля, котрым товаришыла особа Богдана Малешы, сміло мож рахувати в десятках десяток. Тоту номінацию орґанізаторы плебісциту пропонуют за орґанізацию собітковой стрічы і Свята Комперя.

Актуальний момент голосуваня мож слідити за тым мотузком. Голосы мож давати до 2. лютого/фебруара 2018.р. до 22.00 год. высылаючы SMS зо змістом, якій находит ся в поданым горі мотузку.