Никыфоры в Кракові

12. лютого 2015 р. о 18.00 год. в краківскым Музею Сучасной Штукы одбуде ся вернісаж выставы “Никыфоры”, котрого пунктом однесіня єст творчіст выдатного лемківского маляря Епифана Дровняка, знаного во світі як Никыфор. То выстава троіх польскых артистів: Алины Давидович, Едварда Двурніка і Марека Краусса котры в своіх працах інспіруют ся Дровняком.

Алина Давидович (1918–2007) – звана Никыфором в кабаті, уж од наймолодшых років малювала, як і Никыфор, образкы на чым ся дало – картках, окладинках зошытів, картонах, а пак дарувала іх родині. В більшости то пейзажы, будинкы, люде, жывина, сакральны мотивы.

Едвард Двурнік (нар. 1943) – знаний польскій “никыфориста”, котрий інспірує ся образками Епифана Дровняка, одколи в 1965 р. взріл творчіст нашого представника наівного малярства, пак сам зачал творити подібны працы.

Марек Краусс (нар. 1955) – його доля была подібна до Никыфора, вродил ся ґанчуватий, зато як свій артистычний псевдонім схоснувал мено свого мастера, называючы ся Никыфором Варшавскым.

Більше інформаций найдете на сайті Музею Сучасной Штукы в Кракові.

(на фото: Кадр з фільму “Мій Никыфор”)