„Никыфоры” іхают до Закопаного

Выстава “Никыфоры”, котра недавно была презентувана в Музею Сучасной Штукы в Кракові МОЦАК (вернісаж одбыл ся 12. лютого 2015 р.), переносит ся в Карпаты до Закопаного.

Єй пунктом однесіня єст творчіст выдатного лемківского маляря Епифана Дровняка, знаного во світі як Никыфор. То выстава троіх польскых артистів: Алины Давидович, Едварда Двурніка і Марека Краусса, котры в своіх працах інспіруют ся Дровняком.

Выставу буде мож обзерати од 30. квітня до 7. червця того рока під Татрами в Ґалериі Владислава Гасьора (філия Татряньского Музею) в Закопаным.

Більше інформаций найдете на сайтах Музею Сучасной Штукы в Кракові і Татряньского Музею з Закопаным, а за тым мотузком найдете двоязычний польско-анґлицкій каталоґ о выставі.

О выставі можете тіж прочытаты на нашым портали в части “Погляды” – за мотузком.

Алина Давидович (1918–2007) – звана Никыфором в кабаті, уж од наймолодшых років малювала, як і Никыфор, образкы на чым ся дало – картках, окладинках зошытів, картонах, а пак дарувала іх родині. В більшости то пейзажы, будинкы, люде, жывина, сакральны мотивы.

Едвард Двурнік (нар. 1943) – знаний польскій “никыфориста”, котрий інспірує ся образками Епифана Дровняка, одколи в 1965 р. взріл творчіст нашого представника наівного малярства, пак сам зачал творити подібны працы.

Марек Краусс (нар. 1955) – його доля была подібна до Никыфора, вродил ся ґанчуватий, зато як свій артистычний псевдонім схоснувал мено свого мастера, называючы ся Никыфором Варшавскым.

Долов – знимкы з выставы “Никыфоры”, котра презентувана была в краківскым Музею Сучасной Штукы.