Никыфор з колекциі Центра Культуры в Креници. Выстава в Музею Никыфора

Уж в тоту пятницю – 24. лютого/фебруара, в Музею Никыфора в Креници пройде вернісаж выставы творів Никыфора, але з колекциі інчой, не музейной інституциі. А докладні – з колекциі Центра Культуры в Креници. Першыраз буде вказувана в музею.

Образы Епіфана Дровняка найдеме в колекциях парунадцетьох музеів в Польщы. Найвекшу має Округовый Музей в Новым Санчы. Од 1995 рока в Креници діє Музей Никыфора, што єст одділіньом сандецкой пляцівкы.

Не шкіцы, а скінчены роботы

При постійній експозициі музею вказуючій артистичный варштат Никыфора, першый раз в тым місци презентуваны будут рисункы маляря з архіву креницкого Центра Культуры. Векшіст представляных на выставі образів Никыфора то будут акварелі. Роботы створены в тій техніці принимают за найліпшы в доробку артисты.

В пізнійшых роках артистичной діяльности Дровняк хоснувал тіж ґвашы і кредкы. На выставі вкажут тіж 10 інтересуючых рисунків зробленых олівком. Приняла ся опінія, што рисункы олівком то шкіцы з послідніх років жытя, котрых артиста не встигнул выполнити кольором. Не згаджат ся з том опінійом Збіґнєв Волянін, куратор Музею Никыфора. «(…) смотрячы на презентуваны на выставі рисункы з колекциі Центра, тяжко ся згодити з такым поглядом. Сут то роботы так докладні варштатово опрацуваны, же радше треба принимати іх за скінчены творы» – чытаме в запрошыню до выставы.

Цінна колекция русинків кухен

Збіґнєв Волянін подає тіж, яка є темова обшыр вказуваных на выставі образів. «Креницка колекция обнимат роботы, што находят ся серед найвеце ціненых циклів в творчости Никыфора, такых як м.ін. бескідскы краєвиды з церквами і костелами, желізницьовы стацийкы, святы і сценкы зо світскыма людми, містецка і монументальна архітектура». На бракне тіж рисунків конкретных обєктів з самой Крениці. А нашу увагу звертат куратор музею на малы образкы вказуючы сельскы кухні, але і кухні креницкых пенсийонатів. «То барз цінна колекция, намалюваных певно іщы в меджевоєнным періоді робіт о автобіоґрафічным характері» – оповідат З. Волянін.

Окрем самой Крениці, на роботах Никыфора з той колекциі появляют ся назвы поблизкых місцевости: Поворозник і Мушына, де Дровняк часто «помешкувал» в знаємых лемківскых ґаздів. Вельо робіт має характеристичны, зроблены самым Никыфором, рамкы з узкых пасків кольорового паперя з завішками з ниткы або мотузка.

Незнана узнана колекция

Креницка колекция, хоц дотепер рідко презентувана, єст серед знавців од давна цінена. Уж в 1970 році была опубликувана тека з 12 кольоровыма репродукциями образів з той колекциі, з авторскым коментарьом знаного історика штукы Єжы Мадейского.

«Днес колекция Центра Культуры може служыти промоциі Крениці, так як правдивым амбасадором курорту серед люди штукы на цілым світі стал ся Никыфор Креницкій» – кінчыт Збіґнєв Волянін.

Выстава буде одкрыта од 24. лютого/фебруара до 21. мая тр. в Музею Никыфора в Креници (Бульвары Дітля 19).

Фот. Прес. материялы