Ніч музеїв і русиньска

18-ый май є в календарі записаный як Міджінародный день музеїв. Як раз з тым святом є і на Словакії повязана подія під назвов Ніч музеїв і ґалерій, котра того року одбуде ся в суботу 20-го мая 2017. 13-ый річник Ночі музеїв і ґалерій одкрыє і експозіції, котры вказують богатство русиньской културнной дідовизны.

Музей русиньской културы в Пряшові

Словацькый народный музей – Музей русиньской културы в Пряшові буде мати свої просторы в рамках події Ніч музеїв і ґалерій одкрыты в суботу 20-го мая в часі од 10.00 год. до 15.30 год. Покля дорослы будуть годны познакомити ся з єкспозіціями, котры презентують културу і жывот Русинів, про діти і молодеж музей приготовлює творчі ділні і далшы актівности в рамках „Школы в музею“. Музей оголошать, же на своє собі прийде кажда вікова ґрупа.

Окрім переглядкы музейной експозіції і творчой ділні буде в тот день мож посмотрити собі і курты філмы з русиньсков тематіков а вказовати ся будуть і традічны ремесла.

Так, як і минулого року, і теперь русиньскый музей дав ся при орґанізованю той події довєдна із Словацькым технічнім музейом – Народнов културнов памятков – Соливар. В просторах соливарьского музею буде проґрам продовжовати од 16.00 год. аж до 23.00 год. І в тім музею, котрый одкрывать історію многых століть здобываня соли коло Пряшова, на навщівників чекать інтересный проґрам. Детайлы мож найти на плаґаті під стаьтов.

Гуменне

Хто має інтерес о русиньскы сліды на теріторії Словакії, може іти і до Вігорлатьского музею в Гуменнім. Тот не є офіціално залученый до події Ніч музеїв і ґалерій, но приготовив на суботу свій проґрам в рамках Міджінародного дня музеїв. Свої двері одкрыє в суботу о 14.00 год. і окрім того, же буде мож посмотрити обновлены просторы ренесанчоного замку, котрый є центром музею, і де суть умелецько-історічны експозіції, навщівници можуть іти і до сканзену.

Як раз там мож видіти старый сельскый жывот, деревяну архітектуру, хыжы, котры суть перенесены і з русиньскых сел головно сниньского реґіону. В сканзені находить ся і дереваня Церьков св. Михала Архістратига із 1864-го року із автентічным бароковым іконостасом. В ній одбуде ся в рамках події о 14.30 год. православна літурґія. Русиньскый проґрам має своє місце і вечур. На дворі замку о 18.30 зачне концерт мужской співацькой ґрупы Русинія із Гуменного.

Варгол має проґрам в четверь

Музей модерного уменя Енді Варгола в Міджілабірцях так само не залучів ся прямо до події Ніч музеїв і ґалерій, але Міджінародный день музеїв собі припомяне, і то точно 18-го мая, коли є свято записане і в календарі.

За сімболічне вступне будуть ся робити переглядкы експозіцій із лекторьскым выкладом, браковати не буде ани промітаня документарных філмів о  русиньскім кральови поп-арту Енді Варголови а приготовленый буде і одкрытый атерльєр про навшівників.

Вшыткы детайлы о споминаных подіях в конкретных інштітуціях найдете на їх офіціалных плаґатах, котры можете найти під нашов статьов.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА