Ніч музеїв і ґалерій в русиньскім музею в Пряшові

В суботу 18-го мая 2024-го року одбуде ся шторічна меджінародна подія з назвов Ніч музеїв і ґалерій 2024. І тот рік до події залучать ся Словацькый народный музей – Музей Русиньской културы, котрый про навщівників приготовив богатый проґрам.

Тот почне такой пополідне коментованов переглядков теперішньой дочасной выставы, яка має назву Чаро депозіту, але і постоянных експозіцій, котры суть в музею іншталованы. В тім самім часы зачнуть і творчі варштаты, на котрых будуть навщівници годны взяти участь аж до вечорных годин.

Русиньскый музей приготовив і музичны выступліня, в рамках котрых буде мож видіти Домініку Новотну і Фолклорный колектів Полонина, концертом Правда в скрині одпрезентує ся Владислав Сивый, а вечур буде належати співанкам Юлії Вархолы, матери Енді Варгола, в інтерпретації оперного співака Іґора Куцера.

Ніч музеїв і ґалерій є цілоевропска подія реалізована під покровительством Рады Европы з цільом штонайвеце презентовати културну дідовизну, значіня їй всокочіня і охраны при културній выміні, шыріню інформацій о културній розмаїтости окремых країн і реґіонів Европы, при неформалній освіті і култівованім одпочінку.

Актівности музеїв почас той події суть все орьєнтованы на такы діла, котры почас рока зістають перед навщівниками скрыты. Почас Ночі музеїв і ґалерій ся одкрывають „скрыты“ комнаты і розкрывають таємніці перед очами публікы.

Одкрываня таємніць помагать навщівникам і посередництвом такым способом здобытых знань і інформацій ліпше зрозуміти значіня музеїв при охрані елементів културной і природной дідовизны, котры ся сохраняють в музеях.