НІ для асфальту в долині сел Чорне, Долгє, Радоцина…

«Хочеме, жебы представникы локальных власти взріли, што не єст то выключні далекій і неважный кавальчык на краю ґміны, але маєток, што має веце як ґмінну вартіст, котрый треба хоронити перед масовом і змоторизуваном туристиком» – пишут в петициі до власти ґміны Санкова єй авторы.

В інтернеті явила ся соспільна петиция, котрой цілю є сохранити єдну з послідніх спокійных части Лемковины, сохранити долину о вынятковым характері, яком є долина сел Чорного, Долгого і Радоцины. Збераны сут підписы осіб, котры не годят ся выасфальтувати дорогу, што веде реченом долином.

Ци поведе ся сохранити выняткову долину Лемковины?

Авторы петициі, а заєдно мешканці выміненых сел, вельократні і єднозначні інформували війт ґміны Санкова Малґожату Малух, што хотят оставити характер каменистой дорогы і не хотят асфальту. На стрічы в уряді ґміны 8. червця/юнія 2022 р. війт Малух ствердила, што дорога буде лем ремонтувана, не асфальтувана, зас на зобраню шолтыства Кривой, што прошло 16. серпня/авґуста тр., подали інформацию о асфальтуваню дорогы, а тото в 95 процентах мают сфінансувати Державны Лісы.

Під петицийом находит ся уж веце як 3600 підписів. Противниками такой формы ремонту дорогы сут жытелі сел, туристы той части Лемковины, природникы – особы з цілой Польщы, для котрых выасфальтуваня дорогы спричынит, што на все змінит ся, на гірше, характер долины.

«Положыня асфальту знищыт краєвидовы приметы того місця, спричынит векшый рух авт, а што за тым іде – зменшыт безпеку люди і звірят, дорога єст барз узка і з закрутами, а натуральна верства вымушат вільну і осторожну ізду. Шляк тот од років єст єдным з красшых пішых і роверовых пути і най так остане. Жытелі противлят ся выасфальтуваню дорогы» – пише при підписі петициі Мария Стшелецка, авторка книжок для діти, што навязуют до спадковины Лемковины.

Кому треба дорогы?

Власти ґміны ремонт арґументуют фактом, што ліпше провести єден порядный, як фурт і фурт по части направляти дорогу, бо тото ґенерує векшы кошты. Інвестиция мала бы быти реализувана при схоснуваню великой дотациі (95% коштів) од Державных Лісів. Не бракує голосів, што як раз то тота єдиниця довела до планного стану дорогы і для своіх потреб хоче мати ліпшый доізд до одремонтуваного осередка. «Державны Лісы нищат дорогы і мосты всядиль (смотр Воловец), але фінансуют одбудову лем там, де самы хотят. А на Радоцину хотят, зато же мают гын свій школіньово-готельовый осередок. І то єст єдина причына, для котрой дорога в глубину долин має быти выасфальтувана» – коментує на своім фб-профіли Моніка Шнайдерман, жытелька сусіднього до долины Волівця.

Війт ґміны Малґожата Малух твердит, што підтримує деклярацию з червцьовой стрічы. Подає, што в реченій обшыри ґміна выремонтує веце як 11 км доріг, з чого асфальтом покрыют коло 1,65 км. Першый фраґмент, 990 м, хотят положыти од блоків в Ясюнці, зас другій, долгости 650 м, мал бы свій початок на высокости готельового осередка в Радоцині.

Надлісництво додає, што є то єдиный публичный доізд до сел Ясюнка, Чорне, Долгє, Радоцина і лучыт ся з підкарпатскым воєвідством через ґміну Крампна. «Технічный стан дорогы дозвалят хоснувати єй лем при добрій погоді. Коли ліє ци коли топит ся сніг, дорогу тяжко переіхати, єст небезпечна з увагы на выбоі, нерівности, выстаючы камені ци болото» – пояснят Конрад Барчык, заступця надлісничого Надліснцтва Ґорлиці. Подає тіж, што през такій стан дорогы ратовничы службы можут мати проблем з доіздом.

Без доізду до Волівця зимом?

Векшый проблем з доіздом мают тепер жытелі сусіднього Волівця, і як раз през діяльніст Державных Лісів, о чым пише Моніка Шнайдерман. «Обізд з причыны недіючого мосту, через котрый роками переізджали должыці з деревом і бетонами (послідня о 5 год. рано дня, коли розъіхал ся мост), єст долгій, веде спадистом, узком лісовом дорогом без місц на мияня авт і два потокы. Най лем поліє або впаде сніг – і будеме одтяты» – спостерігат М. Шнайдерман.

Подібну опінію мают інчы жытелі села, котры в бесіді з нашом редакцийом подали, што власти ґорлицкого повіту (котрому приналежыт дорога з мостом) ани не прібуют крыти, што перед зимом найпевнійше мосту не поведе ся направити.