Неділя невладного

Днешня Неділя называть ся Недільов росслабленого або невладного. Із причіны дії, коли Ісус приходить до овчой купальні, місця, де омывали вівці призначены на жертву в Єрусалимскім храмі. Там было пять крытых дворців, де лежало много хворых різной сорты хворот. Ісус там находить єдоного чоловіка, котрый там довгы рокы лежав. На часы там до воды сходив ангел Божый і колотив воду. Хто першый вступив до воды, быв выздравленый із каждой хвороты. Ісус ся звідать хворого: Хочеш выздравити? Він одповідать: Господи, не мам чоловіка. Якый смутный образ. Єрусалим велике місто, повно народа, а не было никого, хто бы допоміг тому терплячому. А він тепрлезливо зношать своє терпіня. Не розъїдать ся на на никого, ани на людей, ани на Бога. Ісус му говорить: Возьмий свою постіль і ідь. Приклад великой віры. Не бере то як высміваня, тоты слова, але увірив Ісусови і здобыв здравя. Ісус його стрічать в храмі і говорить му: Ты выздравив, веце не гріш, абы ся з тобов не стало дашто гірше. Най тоты слова резонують в нас часто. Ісус свойов смертьов і воскресіньом і нам подаровав здравя, одпущіня гріхів. І нам говорить тоты слова: Встань, жый в слободі, але тыж і мерькуй. Не вертай ся до рабства, абы ся ті не стало дашто гірше. То значіть вічне росслабліня, вічна погыбель. Бог не хоче смерти никого – то є вічной смерти, але решпектує слободныу вольбу каждого. Хрістос воскрес!

В неділю, 22-го мая 2016 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 22-го мая о 12.00, 15.00, 20.00 год. і 23-го мая о 2.00, 8.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Фото: «Исцеление расслабленного при Овчей купели.» Росия, друга пол. XV ст. Жрідло вікіпедия.