«(Не)Чутливіст» – показ спектаклю в Устю Рускым

Од 20. липця/юлия до 2. серпня/авґуста в ґміні Устя Рускє проходит табір для діти, першый такій, Літо в Театрі. Назва проєкту, в рамках котрого орґанізуваны сут занятя, то «(Не)Чутливіст». О його початку інформували сме вас хвилю тому. Участникы вєдно з ведучыма занятя експериментуют, інспіруючы ся нобелівском мовом Ольгы Токарчук. В надходячу неділю пройде показ ефектів іх діянь.

«Чутливіст є глубокым перенятьом ся другым бытом, його нетырвалістю, неповторністю, його браком вытрималости на терпліня і діяня часу. (…) Чутливіст є том найскормнійшом одміном любови» – пише в своій нобелівскій мові Ольга Токарчук. Тота нелегка тема, богата в учутя і емоциі остала лейтмотивом Літа в Театрі в Устю Рускым.

Спілорґанізатором табору є Ґмінный Осередок Культуры в Устю Рускым. «Зголосили ся до нас діти праві з цілой ґміны. Было веце охочых як місц, зато рішало, хто першый ся зголосил. Вшыткы сме барз щестливы і горды, што проєкт з Устя Руского отримал дофінансуваня і же завдякы тому можеме быти близко театру, мы як публика, а діти як творці» – бесідує Януш Щепанек, директор ҐОК в Устю.

Дуже емоций, вражливости, та… чутливости

Протягом двох тыжнів діти могли познати найрозмаітшы учутя, робили з тышом, пережывали ріжны емоциі. Были то занятя з погранича театру, танця і музикы. «Завязали ся новы приязни, зродили новы, кольоровы думкы. Было вельо зворушынь та іщы веце усміхів на ґамбах діти» – реляцийонує Марлена Моздзіньска, координаторка проєкту.

Ефекты спільных стріч вкажут в найблизшу неділю, 2. серпня/авґуста, о 17.00 год. в парку коло костела в Устю Рускым. «Чутлива Банда», як самы себе называют участникы варштатів, вполни дали понести ся забаві і роботі над показом. Іх провідниками по світі театру, руху і музикы были інструкторы: Моніка Бабуля, Ґражына Копець, Кристиян Данєль Лысонь та Михал Ламжа, люде звязаны з Низкым Бескідом.

«Зворушаюче є тото, што в тых дітях є тілько охоты до роботы, коли треба зосереджают ся, а так само чутливіст на інче. Є вражливіст на тото, што деликатне, сут зрозумліня, приязнь, творче думаня, креативне діяня» – бесідує Моніка Бабуля, театральня інструкторка.

Літо в Театрі є проґрамом Театрального Інституту ім. З. Рашевского фінансуваным зо середків Міністерства Культуры і Нацийональной Спадковины.

Фот. Материялы орґанізаторів