NCIS Карпаты

Зачати чітати нове чісло Вісника СФУЛО (то є тота федерація, што доднесь повнить узнесіня комуністічных партій і деякым способом намагать ся далше українізовати Русинів без огляду на то, же окрім Україны сьме на нашых історічных теріторіях всягды вызнаны як окрема народность, што вже досправды стоїть за то, роздумовати на даякыма судныма жалобами), є все рішыньом, котре выжадує смілость і добры нервы. Напрік тому, єм то зробив зясь. І так як все, і тот раз єм ся позвідав самого себе, ці то іщі даколи хочу чітати. Кідь але чоловік хоче писати, і мати інформації (блажены тоты, котры таку потребу не мають), мусить тоты різіковы припады брати як часть свойой роботы. Чітаня остатнього чісла але не было так цілком на шкоду. Дізнав єм ся, же нам ту выростать нове NCIS Карпаты, в котрім роблять вынятковы форензны робітници. Конкретно можу спомянути дві мена: Богдан Гальчак і Мирослав Сополиґа. Дамы і панове, познакомте ся.

Зачнеме тым першым. Пан Богдан Гальчак, котрый є представленый як історік, якый написав книжку „Історія лемків“, окрім того, же плаче над тым, же Лемкы не знають літературный україньскый язык, як добрый карпатьскый кріміналіста про Вісник говорить, же його книжка ся істо не буде любити прихыльникам карпато-русиньской орьєнтації, чім потверджує свої вынятковы дедукчны способности, жебы такой нато дав рядну шайбу вшыткым Русинам, кідь одкрыє їх співпрацу з Московов. Як? Просто. Форензный робітник Гальчак на то пришов методов, за котру бы ся не мусив ганьбити ани Еркіл Поаро. Тадь він сам много раз чув, як Русины бісідують, же їх нич незвязує з Українов, але ниґда од них не чув, же їх нич незвязує з Росіянами. Калап долов. Може то буде тым, же нам нихто не бісідує, же сьме лем частьов російского народа… Одповідь зохаблю на інтеліґінції чітателя. Докінця твердить, же в тім часі суть звязкы Русинів з Російов евідентны. Доказы евідентности але уж кріміналіста, котрый роскрыв велезраду, не спомянув. Но нич, може нас іщі несподівать в даякых далшых выданях „доброй“ пресы.

Тот другый є в моїх коментарях помалы реґуларна роль. Може зачну робити шпеціалну рубрику, котра буде мати назву „Жываньства пана Сополиґы“. І тот ся в новім чіслі Вісника вказав, же не є лем історіком, етноґрафом ці директором Україньского музею у Свіднику (гей то є тот музей, де є вшытко русиньске, але чом бы ся то мало вернути Русинам, гейже…). Тот є у своій статі смутный, як журналісты попсули статі з ним і він хотів повісти дашто інше. Головне, што нам хотів повісти є, же кідь бісідовав о тім, як ся Українці на Словакії мають підло, та не думав тым, же то Словаци їм сыпуть сіль до одкрытой раны, але русиньскы лідры (не забыв перед то дати тзв. а аж потім русиньскы), якы нас (зрозум Українців) зрадили і продовжують в розколі на Українців і Русинів подля заокеаньскых і кремельскых сценарів. Далша роскрыта велезрада. На жаль, тот форензный кріміналіста, шпеціалізуючій ся таксамо на важны злочіны, не быв такый щірый як пан Гальчак, жебы чітателям повів, як ку тому дішло, як на то пришов ітд. Властно він не мусив, бо він то, як ку тому дішло і хто за тым стоїть вказав уж в попередніх частях серіалу. Тадь то пояснив вже нераз у своїх публічных выступах і теперь лем на то звертать увагу, бо злочінці іщі все не сідять в арешті і навеце теперь собі дозвили робити інтернетову петіцію.

NCIS Карпаты буде певно найоблюбеніше міджі мірныма жытелями Україны, котры зачінають іти европсков путьов. Предці лем, не є то дурна Америка і їх продукція. Тото є таке наше, европске. Націоналістічне. Не глядають убийців, але людей, котры роблять векшы злочіны – зраджають народ і найліпшу державу на світі. Як? Хотять свої права. Тото нас інтересує. Тадь то може быти велезрада. Нажаль, же ани єден із нашых детектівів, котры пришли на епохалны знаходкы, не споминають конретно то, хто співпрацує з Москов ці Америков, як Русины і хто конкретно шкодить на Словакії Українцям ітд.

Я знам, взяти собі до рота даяке мено, то вже є міцна кава. То бы може треба было і обгаїти перед судом. І їх форензны методы іщі якбач не нашли такы доказы, з котрыма бы тот суд могли выграти. Но але є ту і друга можливость. Же покля такы доказы не дадуть, пак ся конечно найде хтось, хто перед судом буде хотіти пояснити то, як можуть панове з NCIS Карпаты криво оскаржыти єден народ зо співпраці з Москов ці Америков, як му можуть одоперати право на існованя, кідь в їх державах їм тото право є признане ітд. Но, наш кріміналный серіал може быти іщі досправды інтересный…

Петро Медвідь, Пряшів

(Статя была написана як коментать „Вступне до контроли“ лемківского радіа lem.fm)

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА