Нацийональне Свято Русинів Сербіі

Нацийональне Свято Русинів Сербіі што рік од часу його схваліня Світовым Конґресом Русинів є празднуване 17. січня/януара. Того рока центральны празднуваня про Русинів головно з Войводины одбудут ся в суботу, 14. січня/януара 2017 р., в Бікіч Доли, Шыді і Берсакові, де вєдно Нацийональний Совіт Русиньской Нацийональной Меншыны, Завод за культуру войводиньскых Русинів та Орґанізацийний Комітет центрального праздника просят на цілоденны святкуваня.

В проґрамі, котрий зачне од 15.30 год. передвиджено культурны акциі, маючы на ціли промоцию і підтримуваня русиньской нацийональности в Сербіі. Найперше в основній школі одбуде ся промоция книжкы о Русинах в Бікіч Доли, пак од 17.00 год. в місцевій грекокатолицкій церкви Успіня Пресвятой Богородиці одслужена буде архієрейска благодарна Служба Божа. Будут іщы дві выставы. Перша з них пройде в Бікіч Доли – буде то выстава Мариянны Барна і Ольґіцы Лукач та Етно-стіл. Отворіня другой з них пройде о 19.15 год. в Бібліотеці Симеон Пищевич в Шыді, а буде то выстава прац Анджелікы Античевич та Драґіцы Жывкович Лели. О 20.00 год. приде час на велику святочну академію при участи выступуючых в тот ден артистів, яка пройде в Шыді. Послідньом з акций Дня Русина в Сербіі буде пізна вечеря в реставрациі Далас в Беркасові.

Світовий Конґрес Русинів в 2007 році принял ідею, жебы кажда з членьскых держав, в котрых прожывают Русины, вызначыла єден ден в році, котрий буде торжественно правднуваний як памятка нацийонального дня. Напримір Польща тот ден одпразднувала місцяц тому, 5. грудня/децембра 2016 р., на памят віче во Фльоринці, котре дало початок пізнійшій Рускій Народній Республиці Лемків. Русины Словациі празднуют 12. червця/юнія, на Украіні 24. квітня/апріля, в ЗША 26. жолтня/октобра, в Хорвациі 23. мая, а в Сербіі 17. січня/януара. Речены даты припоминают вызначны подіі з жытя русиньской нацийональности з поєдных членьскых державах СКР.

Ден Русинів Сербіі є встановлений на 17. січня/януара з нагоды припоминаня собі дня, коли в 1751 році радця Мариі Терезиі і адміністратор Королівско-Державного Бачского Дистрикту в Зомборі Франц Йозей де Редль підписал перший урядовий документ – Контракт о заселіню 200 русиньскых грекокатолицькых родин зо Земплина до товдышнього Великого Керестура. Тот ден бере ся за початок бытя Русинів на тій териториі. Ден Русинів Сербіі першыраз был святкуваний в 2008  році.