Як сьме вже інформовали, од 12-го до 17-го апріля 2021-го року проходила робоча навщіва Мілана Яна Піліпа, председы Уряду про Словаків жыючіх в загранічу, у Сербії.
Піліп окрім стріч з представителями словацькой меншыны в рамках неофіціалного проґраму стрітив ся і з русиньсков комунітов, кедь навщівив Руськый Керестур. Якраз навщіву шефа загранічных Словаків, котрый сам є Русином, і є актівным у русиньскім русі на Словакії, схосновали Націоналный совіт Словаків і Націоналный совіт Русинів як принагоду на підписаня меморандума о співпраці.
Меморандум за участи Мілана Яна Піліпа підписали председове тых двох націоналных совітів – Лібушка Лакатошова за Словаків і Борислав Сакач за Русинів, дня 16-го апріля в Старій Пазові, містечку у Войводині, де жыє чісленна словацька народностна меншына і словацькый язык є там єдным із урядных языків.
Підписаный меморандум, як інформовала аґентура Рутенпрес, має сім пунктів общого характеру і не обмеджує окреме і незалежне діяня сіґнатарів. Меморандум має в цілях розвиток односин меджі словацьков і русиньсков меншынов у Сербії, меджікултурну співпрацу, признаваня традіційных і історічных цінностей двох народів Войводины, як і выміну скушеностей в области културы, освіты, інформованя і урядного хоснованя языка і писма.
Документ має подля председы Націоналного совіту Русинів, Борислава Сакача, вказати і то, же тоты дві народностны комуніты суть напрямены ку мултікултуралізму і інтеркултуралізму, а меморандум хотять схосновати і як формалну основу на выужываня европскых фондів, котры бы могли забезпечіти векшы фінанчны средства про творіня културной автономії двох народностных меншын.
При підписованю была участна і Олена Папуґа, державный секретарь Міністерства про людьскы права, права меншын і соціалный діалоґ а єдночасно єдна з членів Націоналного совіту Русинів у Сербії.
Жрідло фотоґрафії: Рутенпрес.
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА