Нашла ся ікона з Лемковины з XVII ст. Вынятковый забыток є першый раз публичні презентуваный

В ден праздника св. Миколая (за григорияньскым календарьом) Музей Бічской Землі одкрыват перед світом єден з іх цінных експонатів – ікону св. Миколая, яка походит з Лемковины. Ікона николи скорше не была презентувана, а нашла ся недавно в маґазиновых поміщынях Музею.

Як раз св. Миколай был/є серед Лемків вынятково чествуваный. Його ікона находит ся в каждій праві церкви. Ікона, котру нашли обвинену в пакунковый папір в маґазині Музею, є в добрым стані, а тіж вынятковой красы. Датувана є на послідню чвертку XVII ст., а выдатный знавця в обшыри ікон і церковной архітектуры, Ярослав Ґємза, кєрівник Одділіня Церковной Штукы Музею-Замку в Ланцуті, ствердил, што мусіла быти написана в єдным з локальных варштатів. Ікону написали на єдній, грубій липовій дошці, без зміцніня шпонґами. Найпевнійше находила ся в ряді намістных ікон в іконостасі.

Рентґен іконы

«Ікону Музей закупил в 1977 році, а походит з єдной з церкви на Лемковині» – подає Павел Косаньда, директор Музею Бічской Землі. Кінцьом листопада/новембра тр. Музей провюл консерваторскы баданя над памятником – м.ін. діґітальны радийоґрафічны баданя (RTG), котры доказали, што обєкт є монолітичный (значыт представліня св. Миколая не было намалюване на старшым представліню).

«Музей Бічской Землі горячо дякує: Центрови Образовой Діаґностикы Я. Пахана, Д. Щерба (Ґорлиці, Сєнкєвича 36) за безінтересовне выконаня знимок РТҐ, Ярославови Ґємзі, кєрівникови Одділіня Церковной Штукы Музею-Замку в Ланцуті та Катажыні Вінницкій, кєрівничці Одділіня Церковной Штукы Історичного Музею в Саноку за консультациі і материялы до стилистично-порівнавчой і іконоґрафічной анализы» – подає Павел Коцаньда. «Особливы подякуваня кєруєме до старшого техніка Мариюша Ґрубося з Центру Образовой Діаґностикы в Ґорлицях за сумлінный і професийный підхід до проблемы радийоґрафічного розпознаня баданой іконы» – додає на конец директор бічского музею П. Коцаньда.

Фот. Материялы Музею Бічской Землі