Найціннішы експонаты русиньского музея здобудуть діґіталну подобу

Найціннішы експонаты Крайского музея в Пряшові і Словацького народного музея – Музея русиньской културы в Пряшові будуть здіґіталізованы. Інформує о тім Аґентура реґіоналного розвитку Пряшівского самосправного краю.

За помочі модерных технолоґій 3D сканованя будуть зроблены діґіталны копії, котры уможнять їх захованя про далшы ґенерації, і їх сприступніня шырокій публіці.

Експонаты будуть здіґіталізованы вдяка меджінародному проєкту на охрану културной дідовизны Підкарпатя з назвов Віртуалны културны музеї, котрого партнером на словацькім боці є Аґентура реґіоналного розвитку Пряшівского самосправного краю, і на україньскім боці мімовладна орґанізація Ліпшый жывот.

Наскановати бы ся мало довєдна 200 експонатів, із чого бы мали выникнути дві 3D переглядкы. Проєкт рахує і з тым, же ся купить професіоналный 3D сканер, а так само із школованьом робітників музеїв, жебы по закінчіню проєкту годны были продовжовати в діґіталізації далшых експонатів.

Окрім 3D сканованя експонатів проєкт має в цілях створіня онлайн жрідла, котре буде обсяговати 3D копії музейных єкспонатів, і 3D преглядкы музеїв із выкладачом на безплатне посмотріня. Цільом є помочі спропаґовати културну дідовизну Підкарпатя і сприступнити єй людям із цілого світа.

Меджінародный проєкт, до котрого залучены суть і два вызначны музеї на Підкарпатю, буде тырвати єден рік, аж до 20-го януара 2026-го року. Піде на нього понад 172 тісяч евр, і реалізує ся в рамках проґраму INTERREG VI-A NEXT Мадярьско-Словакія-Румунія-Україна 2021 – 2027.