Надія на «Місті рока» в фестівальовым конкурсі

В найблизшу суботу, 27. серпня/авґуста 2016 р., польско-лемківскій роковий ансамбль Надія зо Шпротавы заграт на фестівали «Місто рока» (Miasto Rocka) в місточку Бабімост в любушскым воєвідстві. То фестіваль, котрий орґанізуваний єст од 2009 р., притігаючий знаны ансамблі польской роковой музычной сцены. Надія заграт в конкурсовій части фестівалю в рамках перегляду роковых ґруп.

До жырі, котре буде оцінювало выконавців, орґанізаторы запросили знаны особы з музычного світа: Збіґнєва Зеґлера, Пшемыслава «Джа Джа» Франковского і Томаша Каркошку. Выступуючы ґрупы мают 40 минут на презентацию своіх творів, а можут здобыти, окрем другых нагорід, цінны выріжніня:

• 1. місце – 3.000 зл і награньова сесия в професийональным студию,
• 2. місце – 2.000 зл,
• 3. місце – 1.000 зл.

Фестіваль зачне ся уж в пятницю, 26. серпня/авґуста, музычныма варштатами і проєкцийом фільмів. Посеред фестівальовых акций ведений єст тіж інтернетовий плебісцит на улюблений ансамбль, на основі котрого буде признана нагорода публикы. На Надію і другы ансамблі голосувати мож через сайт орґанізатора – Ґмінний Осередок Культуры в Бабімості. Звіздами тогорічной едициі фестівалю «Місто рока» будут Аґнєшка Хыліньска і ґрупа Резерват.

Надія то шыроко знаний і поза лемківском обшырю ансамбль, котрого лідером, вокалистом і фронтменом єст Андрий Кайфаш. Концертували уж в вельох місцях Польщы і світа, граючы своі авторскы творы і роковы аранжациі народных пісен по польскы, лемківскы і украіньскы. В своій творчости хоснуют не лем міцны роковы звукы, творячы мультіжанрову музыку, інспірувану фольком, фанком, ска і реґе. Ґрупа выгрывала уж деякы конкурсы, м.ін. на «Найліпший любушскій (не лем) роковий ансамбль» в 2013 р. Ансамбль награл дотепер два альбомы: «ДеБют» (2012) і «КуЛьтураль» (2013), а тепер робит над третьом платньом, до котрой зрыхтувал уж промуючий відеокліп. Його промоция одбуде ся вчас концерту Надіі 30. вересня/септембра 2016 р. в зеленогірскым клюбі Пекарня Тихой Жены (Piekarnia Cichej Kobiety).