Над Попрадом міст

Праві скінчена єст будова моста през Попрад, котрий злучыт два русиньскы села – Жеґєстів, на лемківскым берегу і Сулин на пряшівскым. Міст мат праві 130 метрів долгости і 3-5 метрів шырокости. Єст выставлений з бетону, в рамовій тритравейній констрикциі. Ціла інвестиция буде коштувала праві 4 мілийоны злотых (1 мілийон евро), а кошты будут поділены – 60% сфінасує польска сторона, а 40% – словацка. През мосток буде дозволений лем піший і роверовий (біциґльовий) рух.

Самоурядовы власти надіют ся, же мосток дозволит на збільшыня туристычного руху в надпопрадскых селах. Як раз, головном атракцийом надпопрадскых сел сут щавничны джерела мінеральной воды. При самым мосточку мож ся напити славной “сулинкы”.

Ґалерию фотоґрафій, образуючу цілу інвестицию, специяльні для нашого радия зрыхтувала Параска Лелюхівска. Радийо Лем.фм хоче за них подякувати.