Набір до Лемківского Ансамблю Пісні і Танця «Кычера»

Лемківскій Ансамбль Пісні і Танця «Кычера», діючий на чужыні в Ліґниці, оголашат набір до танцувальной ґрупы, капелі і хору. Набір є направлений на вшыктых, котрым близка єст лемківска культура, а котры неконечні мусят мати досвідчыня, звязане з народным танцьом, або співом.

Наборовы стрічы будут ся одбывати в балетовій сали Ліґницкого Центру Культуры.

Веце інформаций найдете на фейскубовым фанпейджы ЛАПіТ «Кычера».

Лемківскій Ансамбль Пісні і Танця «Кычера» был оснований Юрийом Стариньскым в 1991 році з осбіб, творячых тзв. західню ґрупу Пісні і Танця «Лемковина» з Білянкы. Члены ансамблю то молодіж – головні з Нижнього Шлеска. «Кычера» то єдиний ансамбль посеред тых, котры репрезентуют етнічны меншыны в Польщы, якій през долгы рокы был членом CIOFF. В рамках презентуваного ансамбльом проґраму находят ся танці і співанкы з цілой обшыри Лемковины, Пряшівской Руси і Підкарпатской Руси. В репертуарі «Кычера» мож найти стилізуваны лемківскы танці і обряды. Великій труд вложений в опрацуваня репертуару і высокій рівен реалізуваных «Кычером» задач потверджают чысленны нагороды, якыма ансамбль был гоноруваний на просторі вшыткых років свойой діяльности. Ансамбль одбыл вельо турне, м.ін. одвиділ Кытай, Індиі, Індонезию, Ірак, Перу, ци Мексик. Єст тіж орґанізатором Медженародового Фолькльорного Фестівалю Нацийональных і Етнічных Меншын Світ під Кычером.

А гев обряд Федоры, записаний і зреконстуований «Кычером», найдений в сервісі YouTube.

https://www.youtube.com/watch?v=Z4aNsqaIaDM

фото. Фейсбук